西鐵通車後新界西北區樓市變天，屯門站上蓋瓏門繼去年開售連創西北區分層單位新高價「神話」後，入伙以來又成區內租務新貴，至今已錄約30宗租務成交，四房單位月租最高3.45萬元，實用呎租高見38.9元，創西北區分層單位歷來新高，更直逼九龍站上蓋豪宅。瓏門目前四房大宅租盤僅餘3伙，最低月租叫價都3.5萬元，實呎租成40元，代理估有力再創新高。

瓏門入伙後，租金再創新界西北指標。

瓏門四房單位主人套房設有弧形大窗。

瓏門四房大宅租務成交及放盤

西鐵嘅誕生除咗為新界西北區居民帶嚟交通方便之外，另一個最大貢獻相信就係帶動區入面嘅樓價急速追落後，作為屯門站上蓋大型屋苑嘅瓏門，基座設有V City商場配套，即使租務價格拋離區內物業，仍然吸引捧場客爭相租住。

百伙放租 四房戶罕貴

為咗親身體驗呢個新界西北區「神話」嘅威力，劉Sir昨日特登去咗睇現樓二手租盤。據美聯老友謝志遠講，瓏門自上月中入伙以嚟已經錄得約30宗租務成交，平均建築/實用呎租約26/33元，屬區內新高指標，當中瓏門至尊四房大宅租金閒閒地3萬幾，暫時最高成交月租金額為1座極高層G室，連車位月租3.45萬元，建築/實用呎租30.6/38.9元，創西北區分層單位新高。

謝生仲話，目前瓏門有大約100個二手放租盤，當中四房大宅只係得3間，劉Sir昨日就睇咗叫價最低嘅1座30多樓高層G室，月租叫價3.5萬元，若成功租出又創新高紀錄，實用呎租約39.5元，就現場所見，依個被譽為至尊嘅樓王大宅，大廳同主人套房都享受到開揚公園、河景以至遠海景，加上係區內一直罕有嘅四房間隔，難怪會吸引捧場客入住。

蔚峰售轉租 劈10%求客

另外，裕泰興地產轉售為租嘅西環高街蔚峰99，據該公司網頁資料顯示，推出招租緊嘅6伙，實用面積劃一606方呎，最新修訂月租金由2.7萬至3.2萬元，較今年七月首推嗰陣，劈租約一成，減租後，單位實用呎租金介乎44.6至52.8元，貼近鄰近嘅縉城峰水平。