白居二措施推出，即熱爆全港居屋第二市場，但房屋署發言人話，首批約2,500個白居二人士，只有唔夠700個入咗市，不過業內人士就預期，居二市場雖有相當購買力，但受大市氣氛影響，加上可延期情況下，估計居二市場未必會再見到另一升浪。

受大市氣氛影響，白居二買家放慢入市步伐。(資料圖片)

白居二熱門屋苑交投及平均實呎價

房屋署發言人對劉Sir講，到噚日為止，首批約2,500個白居二人士「購買資格證明書」，已經近全部發出，房委會同房協發出的提名信600幾唔夠700封。劉Sir用呢個數計一計，即係依家仲有成大約1,800個白居二仲未入市，再加年尾再有新一批淨低2,500個白居二購買力加入居二市場。

富健慈愛苑價升14%

其實自從呢班白居二喺六月正式入市後，睇番房委會資料，公屋及居屋第二市場，六月即錄到494宗第二市場買賣，相信係近呢幾年新高，好似天水圍天頌苑、馬鞍山錦豐苑同將軍澳寶盈花園，嗰個月分別都錄到成廿多宗買賣，而居二個樓價升得仲癲，直到八月底，屯門富健花園同慈雲山慈愛苑平均實用呎價，較白居二措施推出前三個月升約14%。

但當個價升到咁高，有部分白居二「縮沙」，而房委會資料顯示，八月份只係錄到126宗公屋同居屋第二市場買賣成交，其中天頌苑同錦豐苑最新平均實用呎價，比最「癲瘋」時更錄得8.1%同14.8%嘅跌幅。

有資格者買樓唔急

唔少代理朋友話，近排居二業主放盤都有減價，無奈最有實力嗰批客六月有證就搶住入市，加上減完都係高價，所以就算減價盤都係無人買。祥益地產總裁汪敦敬話，白居二近排減慢入市，最主要係受大市氣氛影響，加上淨番有資格嘅白居二，佢哋未必有咁急切性需求，又可以再延期半年入市，即使近期業主減價，都未必再見到好似六月嗰陣時白居二爭相入市，同埋樓價癲升嘅盛況。