沙田九肚發展區最後一幅地皮會喺今個星期五截標，原本劉Sir都覺得有唔錯反應，因為賣埋就無，但咁啱上周有同區地皮以超低價賣出，搞到測量界都調減今次截標嘅沙田市地段第578號地皮估值，幅度由5至11.1%，每方呎樓面地價低至8,000元，估值下限約莫22.89億元；而同日截標嘅灣仔適安街「蚊型地」，估值就介乎7,800萬至1.12億元。

沙田九肚發展區最後一幅地皮估值被大幅調低，減幅最多逾一成。（資料圖片）

沙田九肚豪宅地估值大減

再有兩幅住宅地喺今個星期五截標，不過，今次呢幅沙田九肚豪宅地就唔係咁好彩，「食正」鄰近地皮以超低價成交影響，劉Sir幾位測量師老友都忍唔住減一減估值，好似韋堅信測量師行林晉超就話，上周批出嘅九肚地皮地價強差人意，即將截標嘅地皮發展密度仲高啲，條件相對無咁好，所以都幾睇淡，佢估計發展商出價競投傾向保守，估值料減約5至10%。

每呎樓面地價睇八千

至於估值「減得最狠」算係高緯環球張翹楚，佢話沙田九肚地皮近排做價「愈賣愈平」，反映發展商出價好審慎，即將截標嘅同區地皮，每方呎樓面地價由原先估計大約9,000元，調減至約8,000元，減幅約莫11.1%。計番估值就大概22.89億元，係目前市場下限價。

另外，亦有測量師老友對地皮估值減幅比較溫和，好似第一太平戴維斯陳超國就話，估計地價唔會有太大跌幅，所以只係略為降低估值約5%。至於美聯測量師行就減約7.8%至預計樓面呎價約8,300元水平。

灣仔奀地最貴估億一

另一幅截標嘅地皮係灣仔適安街「蚊型地」，佔地僅約2,239方呎，總樓面講緊只係約11,195方呎，係今季賣地計劃規模最細嘅一幅地，業界覺得地皮優勢係位置幾好，規模適合中小型財團胃口，但亦因地盤細，發展困難，睇怕競投氣氛都會傾向審慎。市場估值約7,800萬至1.12億元，樓面呎價約7,000至10,000元。