上周美國電動跑車商Tesla話要來華搶地盤，比亞迪（01211）股價一日唔見咗一成，但尋日因杭州推出買車優惠，隻股有番啲起色，以近全日高位29.8元收市，升逾半成，呢舖即管睇吓10日線可唔可以拗腰升穿其他平均線（匯集在29.7至30.2元），扭轉弱勢嘅話，上望33蚊。

杭州為咗刺激消費，自本月起推出10項新政策，唔排除內地其他城市亦會諗計力谷，汽車股板塊自然有運行。睇番成績表，比亞迪上半年多賺25倍至4.27億元（人民幣．下同），雖然政府補貼佔咗3億元多啲，不過汽車銷量大增近兩成半至25萬輛、太陽能業務虧損進一步收窄、手機部件及組裝業務毛利率上升，拉高整體毛利率1.46個百分點至13.6%。另外，第三季係傳統汽車行業淡季，公司預期首三季純利增長19至21倍，至4.3億至4.77億元，暗示復甦步伐放緩，但股價由36蚊碌落嚟，適逢內地金九銀十，可以博反彈機會。

比亞迪股份（01211）

阻力位：33.0元

支持位：26.5元