雖然史提芬經已轉用iPhone多年，但尋日聽到微軟買下Nokia手機生意，仍然感到莫名唏噓，幾乎想喺櫃桶底搵番部陳年6110出嚟懷緬一番。今次微軟僅以54.4億歐元（約560億港元）就買起諾基亞手機生意，回想十年前諾基亞獨攬手機市場半壁江山，估都估唔到今日落得咁嘅下場。

太陽日誌

綜合大行預測海螺業績

以前晚收市計，諾基亞市值得1,130億港元左右，比歷史高峰兩萬億跌掉94%，證明股神巴菲特講過，永遠唔沾手科技股，源於行業變化快兼高度競爭，諾基亞巨星隕落，已是當代一大鐵證。睇番第二季全球智能手機系統市佔率，谷歌的Android佔80%，蘋果公司的IOS跌到13.2%，諾基亞夥拍微軟的Windows Phone得3.7%，正面啲講，基數細短期要做出增長唔難，但心嗰句，兩個輸家的結合，在贏家得天下的科技世界，確實好難睇好。

手機股禾雀亂飛

另一方面，在消息刺激下，手機生產及零部件股禾雀亂飛，TCL通訊（02618）升7.6%，比亞迪電子（00285）升7.2%，富智康（02038）升5.8%，舜宇光學（02382）及京信通信（02342）升4.9%，中國無線（02369）升4.7%，信利（00732）升3.7%，瑞聲（02018）升2.5%，真係睇唔到，到底同諾基亞交易有乜直接關係！

講番港股，前晚美股休市，但大戶得勢不饒人，繼續挾淡，恒指升219點，報22,394點，成交572億，跨周末連升四日，恒指累積升870點。收市後，美銀美林將手上最後20億股建行（00939），以收市價5.93元折讓2至5.1%配售，相當於5.63至5.81元，約等於恒指32至80點，期指夜市一開跌近百點。

八月中國製造業PMI回升至51，創十六個月新高，分析員陸續向上微調第三、四季中國GDP，滬綜指尋日升24點，報2,123點，上番六月中以來高位。

中央保經濟增長，筆者認為水泥股必然受惠，克強經濟學話要保增長穩就業，鐵路基建、保障房等加速投資在所難免，另一個水泥消耗途徑私樓，市場一直估國五條會撐實樓價，令建屋量減慢，事實證明新國五條推出後內地樓愈撳愈升，八月全國新建樓房平均每平米10,442元人仔，連升十五個月。

縱觀六成五內房股上半年已完成過半全年銷售目標，因應市況減慢建屋量的可能性，看來已不存在，反而趁好價趕工賣多啲的機會更大，再睇華南地區水泥價格六月見底後，即使未見大升，但持續個個星期都升十多廿元人仔，估計能夠受惠的包括海螺（00914）、潤泥（01313）以及台泥（01136）。唔想煩，最好揀龍頭股海螺，一三年市盈率13.2倍，比五年平均14.8倍折讓10.8%，行業啱啱先至谷底反彈，仲未計預測上調的可能，不妨留意。