政府雖然不斷推地，但私宅落成進度仲係大落後，七月竟出現「零落成」情況。劉Sir知道，係一○年五月以來，三年幾首現「零落成」，頭七個月累積數字亦只接近1,500伙，僅佔政府全年預測的約11%。有測量師認為落成狀況惡劣，睇怕達標無望。另外，七月亦有3個港島豪宅項目獲批建築圖則，其中南豐壽臣山深水灣徑准建3座洋房及1幢分層住宅。

本港私宅落成進度大落後，七月份更錄得「零落成」，為一○年五月以來首見。（資料圖片）

今年私人住宅落成量統計

劉Sir參考屋宇署最新數據，七月私宅落成出現「零落成」，頭七個月落成量加埋都係得約1,485伙，相比政府預測全年落成量約13,551伙，僅佔預測的約11%。

私宅動工量大跌64%

至於七月私宅動工量約686伙，按月亦大跌64%。高緯環球張翹楚用「惡劣」嚟形容目前私宅落成情況。佢話香港係自由社會，就算政府批地都迫唔到發展商加快發展，再者今年又有新辣招同一手新例等實施，發展商都未必分配到時間，今年睇怕都難以達標。不過，佢話地盤有六至七年建築期，即係點都要起，所以過多幾年落成量可能會多番。

3港島豪宅獲批圖則

另屋宇署喺七月批出13份建築圖則，其中3項係住宅及商住發展，咁啱3個都係港島豪宅項目。其中有兩個係舊年政府批出嘅住宅項目。好似上述南豐壽臣山深水灣徑8至12號豪宅發展，該集團舊年五月用咗60億元買番嚟，項目准建3座4層高洋房同埋1幢17層高分層住宅，總樓面約24.8萬方呎。

而大昌集團（00088）舊年投得嘅淺水灣道近110號，亦都准建8座4至5層高洋房，總樓面逾4萬方呎。另外，西貢清水灣銀線灣道1號，亦准建1座3層高洋房，總樓面大約7,084方呎。

此外，恒地（00012）或有關人士嘅大角咀角祥街25至29號大志工廠大廈，向城規會申請重建1幢26層高商住物業，擬建144伙。