尋日無乜邊隻股睇得上眼,去年七月先轉主板的上海棟華(01103),跌市仍升12%,收報0.91元,即市再創0.94元的五十二周新高,睇番成交亦都配合,雖然有啲「生面口」,不過成績表靚仔,可以關注吓。

上海棟華喺內地從事路橋建設、燃料油貿易、瀝青貿易及物流服務,後三者綜合為石化產品供應鏈服務業務,發揮協同效應。公司今年上半年營業額增長45.5%至28.18億元(人民幣.下同),純利增長67.2%至5,362萬元,原因係收入佔比八成的燃料油貿易業務增長63%,而期內路橋建設業務的已中標但未確認收入8.83億元,反映中標情況唔錯。

另佢將派中期息每股0.025元(去年同期0.016元),計落息率3厘半唔錯,但要留意資產負債比率為71.24%(去年下半年72.95%),只係降得1.71個百分點,待回調至0.8港元邊收集,會較值博。

上海棟華(01103)

阻力位:1.0元

支持位:0.7元