退市走資、敍利亞危機升溫、加埋中石油（00857）及昆能（00135）三名高層遭調查及辭去職務，清一色利淡因素籠罩下，尋日恒指跌350點，收報21,524點，成交激增三成一，去到633億元。以技術走勢，恒指收市價啱啱踩實八月份兩次低位21,571及21,538點延伸出來的頭肩頂頸線21,525點上面，一旦失守，整個八月的頭肩頂形態便大功告成，按量度跌幅計，個市可能要返到去21,000點樓下。

太陽日誌2013/8/29

尋日頁岩氣及光伏一類靠概念多過業績支持的股票，被質到七個一皮；中石油及昆能股價分別插低4.3%及13.5%。以市值萬八億兼屬國家重點戰略巨企而言，幾個高層離任，相信對營運影響微乎其微，唯一係怕仲有其他高層涉及事件，被淡友趁機做嘢。

昆能毋須心急撈貨

出事三人之中，中石油集團副總經理李華林，也是昆能的董事長兼執行董事，此君被芬佬視為昆能注資及增長故事的幕後推手，亦因為咁近期已經積弱的昆能被隊到開晒巷，尋日收市價計，一三年市盈率唔到12倍，幾乎去番中資燃氣股11至18倍的下限，尋日更有大行唱到值9蚊咁悲。姑勿論點，基金洗完倉，短期買番轉頭嘅機會唔大，估計昆能短期響10.5至11.5元之間打底機會頗高，想撈底唔使急於一時。

國美（00493）中期賺3.22億元（人民幣．下同），去年同期勁蝕6.07億，業績明顯改善。期內銷售額升10.2%至271億元，同店銷售升15.1%，存貨周轉日數減少至56日，派中期息0.56分。成績表由紅轉黑，要多得綜合毛利率由16.9%升至18.3%，主要係OEM及ODM產品比例提高銷售毛利率所致，而員工數目由5.5萬減省至4萬，亦令到營運成本回落。

網上銷售毛利率由2.7%改善至6%，網店比傳統店舖銷售員薪酬成本高，上半年蝕1.5億元，比去年同期2.6億收窄，以首季蝕1.2億計，第二季蝕3,000萬算有交代，管理層預告全年蝕2.5億，當毛利率去到8至10%，可以達到收支平衡。

朝電子商貿進發，是否國美必走之路，筆者依然有保留，不過，觀乎上半年網下業務表現，已見到公司努力做出成果（衰啲講係貼網店損失），一四年PE12.8倍，算幾吸引，但升唔升嘅關鍵，仲係果句：網店愈早止血，國美愈早有運行。