加辣招推出六個月，工商舖物業買賣愈來愈靜，有代理話近排商廈同工廈租賃成交比例已佔達九成。如有個中區商廈租客今年初想買上環信德中心單位，涉額約3,400萬，考慮到雙倍印花稅額達289萬元後，最終轉為租用該大廈西翼中層單位。

有中區商廈租客放棄入市後，最終選擇租用上環信德中心西翼單位。（資料圖片）

近月商廈及工廈物業買轉租個案

美聯工商舖（00459）行政總裁黃漢成同劉Sir講，加辣招反而加重租轉買用家入市負擔，唔少人考慮到雙倍稅款，差唔多已經夠畀全期兩年租金，同時又擔心政府短期「撤招」，所以寧願唔買住，租住樓先。佢又話，該行旗下部門近排促成嘅商廈同工廈生意比例，高佔九成係租賃成交。

辣稅額多過兩年租金

事實上，中區唔少甲級商廈呎價已經重回○八年金融海嘯之後水平，但都冇乜人吼。聽講一家原本租用中區商廈嘅企業，今年初擔心加租，諗過買信德中心西翼一個低層單位自用，涉及金額約3,400萬元，呎價只係1.7萬元，點知遇上出招，佢計過數須繳付雙倍印花稅費達289萬元，都係租樓划算啲，最後剎停買樓，轉軚租用該廈西翼中層單位，月租約11.5萬元，兩年租約租金開支都只係276萬元。

力寶租客由買轉為租

另金鐘力寶中心有高層單位租客喺第二季都剎停租轉買計劃，近月決定轉租該廈2座低層單位，月租約6.75萬元，呎租約45元。代理話，該租戶原本想以約2,200萬元，同業主傾買租用多年嘅單位，不過擔心若政府短期放寬工商舖規管措施，將「白白」付出約187萬元雙倍稅額，所以繼續租樓。

因稅貴 棄九龍灣工廈

九龍灣有個舊式工廈租客面臨加租，上季諗過租轉買，本想買同區美羅中心單位，涉資約700萬元，但唔明自己並非炒家，都要畀雙倍印花稅，所以月前決定暫時都係租用美羅中心1期中層單位，月租約兩萬元，呎租約17元。