本季賣地計劃首兩幅推出嘅地皮喺今個禮拜五截標，包括元朗東頭限量地同沙田九肚豪宅地。劉Sir知道，元朗地限制同技術要求多多，市場料每方呎樓面地價可能低至約2,200元，比六月份以呎價僅約2,876元批出嘅西鐵朗屏站（南），仲要低出約23.5%咁多，隨時成為區內賣地呎價最平住宅地，估值低至約5.1億元。

元朗東頭德業街限量地佔地約4.6萬方呎，須提供最少430伙。（資料圖片）

即將截標兩幅住宅地資料

沙田九肚豪宅地（虛線內）亦將於周五截標。

元朗東頭屬於工業區，嚟緊截標嘅元朗東頭德業街限量地，係區內首幅推出嘅住宅用地，面積約4.63萬方呎，可建樓面約23.16萬方呎，限建唔少過430個住宅單位。

或有溶洞 技術要求高

話明係工業區，地皮位置確實唔太好，理想城市張聖典都話，地盤環境較差，而出售章程亦提及到地盤或有溶洞問題，再加土地仍有待投得財團改劃用途同埋提供環評報告等，成本同技術要求較多，所以唔敢睇得太好，估計樓面呎價只係2,200元，估值約5.1億元。

其實，元朗區近年都有幾幅住宅地皮批出，數到最近期係六月份批出嘅朗屏站（南），喺政府多項辣招影響下，成交樓面呎價只係約2,876元，較當時的估值下限已經大幅低出近13%。

若果即將截標的元朗東頭限量地，真係以樓面呎價約2,200元批出，即係較朗屏站（南）仲要還低出約23.5%，勢成為區內最平呎價住宅地。

不過，就算地皮發展上有唔少限制，但競投氣氛應該唔太差。韋堅信測量師行林晉超話，地皮涉及金額唔多，料可吸引唔少中小型財團競逐。依家市場估值介乎約5.1億至7.4億元，樓面呎價約2,200至3,000元。

九肚地周五截料33億

另一幅周五截標的沙田九肚第56A區豪宅地，估值約25.87億至33億元，樓面呎價約8,000至10,207元。劉Sir相信新地（00016）、信置（00083）及永泰（00369）等區內擁地財團，有機會入標擴大版圖。