
太陽日誌2013/8/23
尋日滙豐公布八月中國製造業PMI,由七月的47.7強力反彈到50.1,重返擴張水平,遠高過市場預期的48.2,亦將港股由21,500點附近拉番上嚟。午後,德國公布八月服務及製造業PMI雙雙勝預期,好友再下一城,連跌五日的港股終於彈返77點收市,大市成交576億。不過A股就完全當滙豐PMI無到,微跌5點,收報2,067點。
內地熱賣的小米手機,由中檔「小米4S」,撈過界賣埋799人仔有交易的「紅米手機」,可以平成咁,第一個感覺係智能手機利錢之薄,與股市內受歡迎程度有點不成正比。以中國無線上半年業績為例,純利率2.2%,出名利錢薄的電視生產商創維(00751),過去兩年純利率都有4.5及4.2%,如果中國無線可以去返○九、一○年黃金時期的雙位數純利率,前途當然無可限量,只不過據知唔少內地OEM廠,近來都想轉攻手機組裝,行業毛利及利潤率,筆者認為長遠唔多樂觀,但個市要炒亦都無謂鬥氣,總之要清楚追潮流無問題,但做人世就可免則免。
史提芬

租/售 | 租 售 | ![]() |
樓盤由squarefoot.com.hk提供 |