近排市場有唔少商場同工廈拆細售，好快賣晒，但部分較大額、涉資達半億元嘅物業，市場反應一般。有代理爆料，基金鵬里資產管理或有關人士上月底擬拆售嘅荃灣百悅坊銀座式商廈，依家僅3層樓面有客洽購，聽講業主依家已經變陣，屬意全幢賣，料全幢市值高達10億元。

正進行翻新工程的荃灣百悅坊，樓高近20層，租戶包括餐飲等零售行業。（資料圖片）

百悅坊事件簿

代理同劉Sir解釋，早前拆細賣嘅商場同工廈，由於涉額較細，大約兩百萬元左右就有交易，所以會好快賣清光。

銀碼大 散戶買唔起

至於部分大面積拆售物業，金額閒閒地要5,000萬元，散戶買唔起，所以銷情好慢。

佢又話，上個月底上述百悅坊基金業主諗過拆售，高層全層市值呎價約莫8,000元，圍起上嚟售價要5,200萬，喺依家銀行收緊按揭之下，加上物業短炒近乎絕迹，所以有興趣及有實力買嘅人唔多，基金亦曾構思送埋雙倍印花稅費用，依家都只有3層聽講有客想買。

由於幢物業都幾近荃新天地同荃灣廣場，喺協同效應下，銀座式商廈全幢反而有人吼，聽講若果有客出價吸引，基金都會諗諗全幢賣，幾錢就唔知，不過，市場就估計全幢市值約莫9億至10億元。睇番資料，鵬里資產管理或有關人士喺舊年年中，向「玩具大王」蔡志明等，以逾5億元購入。

亞區甲廈租賃意欲降

環球經濟大上大落，機構對租用寫字樓意欲大減。高力國際報告話，亞洲區寫字樓租賃市場信心指數連跌兩季，上季得番57.6%，其中新租賃查詢同埋寫字樓租金期望指數，喺上季分別只錄得53.3%及64.4%，都係呢個調查喺二○一二年首次進行以來最大跌幅。

有代理話，尖沙咀漢口道一個原由個人護理用品店租用舖位，啱啱畀另一租客以每月40餘萬元承租，較前租金升3%都無，零售舖租都麻麻哋。