港股在颱風下休市，隔晚期指夜期收22,437點，比日間時段跌112點，但當時美股正值即市低位，不宜作準。重申由周一急升日未平倉合約的變動所見，似乎好友大戶仲未有咁快鳴金收兵，如果即市調整番到去22,280至22,385點，應該有一定支持。

美股動力明顯減弱

近期中港股市回復強勢，緣於內地多項經濟數據好轉，短期投資者修正對中國經濟過度悲觀的展望。事實上，過去六個月內地A股是全球最差表現股市之一，累積跌逾一成，港股亦跌逾3%，較日股的逾兩成升幅、標普五百指數的逾一成升幅、以及泛歐股市Euro Stoxx的7.8%升幅，跑輸九條街，藉着中國經濟數據無估計咁差，美國退市預期再度升溫，基金搵最落後的中港股市埋手。

事實上，標普五百指數及道指雖然在高位徘徊，但八月初至今，兩者已先後呈MACD熊叉，動力明顯減弱，如果九月退市預期進一步升溫（十年美債息周三晚已抽上2.715厘，與五月急升上來的高位2.737厘一步之遙），唔排除出現一次像樣調整。

到底中港股市會跟隨向下，抑或激發今年持續湧入華爾街的熱錢回流亞洲市場，由本周兩日的中港股市走勢睇，似乎第二個可能性稍高一籌。