港股因颱風關係休市，吹走魚缸幾百億銀成交。A股表現偏軟，滬綜指險守2,100點關，滬、深兩市主板總成交逾2,100億元人仔，都算站穩住腳。工信部話，國務院將出台鼓勵信息消費方案，變相為即將上市的阿里巴巴同頭號影子股騰訊（00700）送上東風。

中資股炒到咁上下，弱勢板塊亦隨時起動，內地航空股中，以東航炒味較濃。(資料圖片)

聚焦內地，未來焦點在十月的十八屆三中全會。據投行統計，本月以來投資者對經濟前景信心有所改善，而在三中全會召開前，官方會公布更多關於推動節能環保及改善民生的措施，消費、健康護理、鐵路、建材、基建以及環保類股可受惠。

內地企業生意難做

事實上，最近傳來連數一數二的富有省份都話財政狀況唔係幾好，要向財政部伸手，顯示已有足夠條件叫中央出手「維穩」，而短期「維穩」只是換取時間加快解決長期問題。以企業所得稅為例，今年上半年，除了電、造紙、原油及卷煙等行業企業稅收有增長，其他如電訊、鋼材、煤炭和有色金屬等行業，企業稅收均錄得雙位數字跌幅。經濟差生意難做，但勞工成本卻不斷上漲，企業蝕入肉，結果唔係關門，就係要大幅縮減經營規模。

企業有錢賺，始可再投資設備同研發，以維持長期增長；如今企業經營困難，地方政府又因水緊未能應付上繳稅款，結果向企業開刀徵「過頭稅」（即要求企業預繳稅款或加大稅率等），咁落去不利外來投資，情況堪憂。

調控鬆綁內房行運

講番個股，溫州如期獲鬆綁樓市限購令，內房股有運行，短炒可留意尋日推介的首創置業（02868），若想發掘細價內房股，則可留意人和商業（01387）及沿海家園（01124）。

此外，環顧咁多個中資股板塊，航空股仍然低迷，但弱勢總有其原因，今年以來經營冇起色唔在講，下半年即使行業需求隨「維穩」措施推出而有所回升，但亦難以抵銷人仔升值、經營成本上漲及廉航的挑戰。所以，呢個弱勢板塊，應該等到大部分中資股板塊經已炒到咁上下，先至好冷敲。

在南航（01055）、東航（00670）及國航（00753）三者之中，股價走勢都係咁上下，但參考過往經驗，若然板塊起動，東航起步較快，炒味較濃，不妨耐心捕捉短炒機會。