近排舖位買賣愈來愈少，四大核心零售區成交量少到嚇死人。今年四至七月期間，中環區只係錄到2宗舖位買賣合約登記，期間更有兩個月「食蛋」；而尖沙咀區今年七月僅錄13宗成交，同今年高位比低咗98%，係交投跌幅最大地區。銀行估價保守，預計舖市買賣繼續靜局。

中環區

黎永滔表示，今年上半年商舖買賣少，而中環區舖位買賣氣氛極度淡靜。(資料圖片)

旺區舖位買賣宗數一覽

舖位資深投資者黎永滔（滔哥）話，銀行對商舖按揭估價好保守，等同閂水喉，相信今年內買賣低迷情況難有轉機。

滔哥同劉Sir講，政府出招事小，銀行對商舖估值好多時低市價約一成，加埋雙倍印花稅等開支，買家差唔多要先畀七成舖價入市。

睇番利嘉閣同代理畀嘅資料，中環今年三月舖位買賣合約登記有12宗，由於數字係反映上個月買賣情況，即係辣招影響重未完全浮現。踏入四月舖位登記量即插水至只1宗，五月及六月份罕有咁「食蛋」，七月份再只錄1宗買賣登記，比今年高位登記月份少咗約92%。

尖沙咀上月買賣少98%

單以七月份市況睇，比較番今年高位舖位交投，尖沙咀萎縮幅度最嚴重。今年初首都廣場1至3樓共約600個舖幾日全部賣晒，刺激二月份錄買賣登記合約679宗，之後嘅三月份登記跌到40宗。七月份仲慘，比起今年高位登記月份縮水98%。

先達一籃子舖值逾億

不過，旺角一線街舖連錄多宗過百萬元大額租賃成交，區內業主都乘勢放售，第一太平戴維斯獲康健國際（03886）行政總裁曹貴子或有關人市委託代理放售先達廣場一批地舖，其中G12號舖市值料4,000萬元，呎價差唔多40萬元，同該廈單邊小食店早前天價放售呎價只低15%。至於是次業主同時放售G27至G29號舖市值1億多元，該批舖總市值較業主兩、三年購入價高1.2倍。

部分地區地舖租金就有壓力，聽講原本由美容纖體公司租用嘅紅磡黃埔新邨一個地舖，二月左右搬走後，依家畀間鞋舖每月12萬元租咗，較前租金平咗近1萬元。