魚缸Blogger：精電業務持續增長

四月推介過嘅日圓貶值受惠股精電（00710），股價喺五月創出7.1元的五十二周新高後抖咗陣，尋日以大裂口高開逾11%，收報6.38元，升幅逾13%，成交急增。如果短線回吐仲守得住上升裂口5.7至6.15元嘅話，有勢挑戰今年高位。

精電業務包括汽車、工業及TFT（薄膜電晶體液晶）顯示屏以及觸屏，繼去年下半年業績出現改善後，今年上半年營業額增長12%至11.9億元，純利增長1.97倍至1.01億元，其中收入佔比逾七成嘅汽車顯示屏業務增長29%，抵銷咗工業顯示屏業務營業額下跌嘅影響。

另外，隨住公司配置自動化設備、改善生產流程、設計高增值產品，同埋上半年日圓貶值令日本原材料成本下降，期內毛利率升2.9個百分點至24.5%，愈做愈好，而佢喺廣東省河源市的新增生產線，料於年底全面投產，可以接到更多訂單，有助業務持續增長。