股海實戰：思捷 有望走出低潮

由於內地「水喉」有放鬆迹象，加上預期年底前中央會加大力度推動各項基建投資，可為中資股嘅基調帶來支持，從呢個角度睇政策面較上半年好。之不過，外資對內地地方債問題仍有戒心，美銀美林最近發表嘅報告話，審計署要查地方債務，其實相關工作已籌備數月，相信係新一屆領導人有意藉此為前朝手尾結帳，以劃清界線，亦好讓內地增加地方負債嘅透明度，相信審計結果不會令市場感意外。

內銀毋須太悲觀

上一次政府審計地方債喺一一年進行，結果顯示截至一○年底地方政府債務總額約10.7萬億人仔。由於這次審計將包括鄉鎮政府債務，該行預計截至一二年底止嘅總規模達到15萬億至16萬億元人仔，佔GDP約三成。至於解決地方債嘅路線圖係，讓中央承擔更多開支及借貸嘅責任，控制地方政府債務增長；發展地方債市，以將地方短期銀貸責任掉期至長期債券，以與長期基建融資相配，以及將部分已入帳嘅地方債透過轉移中央政府以作出清理云云。

喺處理地方債務問題明朗化前，內銀股陰霾難消，故買中資金融股寧首選券商股。內銀股雖然身處調整期，但只要處理好地方債，經濟結構調整過後，自有一番新天地，毋須過於悲觀。每個行業、市場、經濟都有其周期性，能夠安渡低潮重新上路嘅都係具實力嘅企業。好似六年前仲係「紅底股」嘅思捷環球（00330），高峰期股價曾高見120元水平，經歷歐債危機及歐美經濟低潮，股價一度不足7元。經過逾年整固，如今已重上13元樓上，上周五收報13.58元，乃去年十一月中以來高位。

去年十一月前大股東邢李（火原）披露增持至逾5%，平均價11.669元，雖然之後股價曾失增持價，但次季以來反覆向上，周線圖顯示，已連續兩個月10日線企喺50日線樓上，乃過去三年鮮見嘅強勢，是否預視否極泰來，值得關注。下兩個阻力位喺14元及15.5元，守50日線11.82元可續持有。