長沙灣永康街7號西港都會中心，在本年初獲准改裝酒店，提供230個酒店房間。

早年工廈活化措施推出，吸引唔少工業家申請將工廈全幢改裝酒店，不過近排內地個人遊消費力似乎無以往咁強勁，再加上檔次同地區性問題，合適改裝酒店嘅工廈已經買少見少。劉Sir知道，今年上半年城規會只批咗兩宗改裝酒店申請，房間加埋都係得429間，比舊年下半年大減約67.2%。

長沙灣永康街7號西港都會中心，在本年初獲准改裝酒店，提供230個酒店房間。

城規會批出工廈改裝酒店申請

劉Sir睇到城規會一份資料，原來自從工廈活化措施喺二○一○年實施至今，該會一共處理咗28宗將現有工業大廈整幢改裝酒店用途嘅規劃申請，其中26宗獲批，而延期審批同拒絕申請就各有1宗。

僅兩幢工廈准改裝

其實工廈活化措施剛實施初期，城規會批出嘅工廈改裝酒店申請都唔算多，去到一一年底該署批出嘅同類申請先明顯增加。不過，近排同類獲批個案已經減少，上半年只有兩宗全幢工廈改裝酒店申請獲批，比起舊年下半年嘅4宗少咁一半，相比舊年同期嘅8宗，更顯著減少約75%。

講到酒店房間數目，仲萎縮得誇張，今年上半年得兩宗獲批申請，其中較大規模嘅長沙灣永康街7號西港都會中心，都係得230個酒店房間，兩宗加埋得429個房間，比較舊年下半年同上半年錄得嘅1,306及2,522個房間，勁跌約67.2%及83%。

劉Sir知道，本港酒店其實有一定需求，但工廈改裝局限性始終較多。老友高緯環球張翹楚話，其一係基於設計布局上嘅問題，工廈改酒店九成九只夠能發展三星級酒店，加上近排內地個人遊消費力又無之前咁強，改裝做酒店已未必最「划算」。

改建寫字樓更划算

佢話，其二係地區問題，目前劃作「其他指定用途」註明「商貿」地帶嘅工廈區唔多，葵涌、觀塘及九龍灣都仲有，但觀塘及九龍灣改建寫字樓潛力比較好，所以葵涌算係較合適工廈改裝酒店嘅地區。

另一方面，喺舊年初開始批出嘅16宗工廈改裝酒店申請，就有8宗係來自葵涌，其中以舊年一月批出嘅葵昌路運通製衣大廈規模最大，當中涉及598間酒店房。