魚缸Blogger：中國聯塑搭順風車

尋日隻中國聯塑（02128）以大陽燭同大成交收市，急升12%報4.45元，差啲就收復埋250日線4.53元，睇勢話唔定可以踢上五月高位4.92元，想跟炒一轉嘅話仲未怕遲。

睇番成績表，聯塑去年收入增長7.4%至108.9億元（人民幣．下同），純利倒退1.8%至12.38億元，原因係平均售價由前年的每噸10,325元，降至去年的每噸9,626元，減幅6%，幸好期內平均成本亦降7%，可見佢嘅規模效益有助穩定利潤。

另外，為咗進一步擴展生產線，年初公司就斥1.16億元收購從事製造閘閥產品的廣東聯塑閥門，同既有業務產生協同效應。隨住城鎮化的發展，住房及通訊需求強勁，同時環保節能得寵，水利發展同燃氣供應係大方向，長遠嚟睇管道需求自然有增無減，聯塑具炒作概念！