Fundman睇市：內房股 可鎖定目標

聯儲局會後聲明指，指通脹一旦長期低於2%，會為經濟表現帶來風險，也提到按揭利率近期回升，對樓市復甦構成一定程度壓力。簡單講，聯儲局係繼續冷卻市場退市預期，潛台詞話畀全世界聽，買債唔係鐵板一塊。估計無論是伯南克，抑或明年二月接任的新聯儲局主席，在通脹情況許可下，貨幣政策都會係寧鬆莫緊，至少佢把口會係咁講。

硬着陸風險紓緩

中國官方的七月製造業PMI為50.3，數字比六月的50.1回升。分析師估計在中央有限度增加固定投資下，第三季GDP應會有輕微回彈，按年升7.6至7.7%左右。經濟硬着陸的風險稍為紓緩，港股也終於突破22,000點心理關口收市，收市升205點報22,088點，美中不足是主板成交額不升反跌，比前日跌市少19億至468億元，反映機構投資者對後市依然審慎。

中共中央政治局會議提及，下半年經濟運行在合理區間，被解讀為暗示「保七」或「保7.5」，城鎮化之外，最受注目是當中提到「促進房地產市場平穩健康發展」。大行估計，下半年「國五條」因為唔夠力而加辣的機會，經已微乎其微。早兩個月筆者講過，內地無論進出口以至各行各業，都等緊中央政策打救，唯獨是樓市（溫州除外），把火真係撳都撳唔熄，與其亂石投林等中央送禮，不如博政府投鼠忌器，放生樓市短期唔出招打壓，由政治局內容來看，是押中注了。

傳統上，第三季是內地樓市銷售旺季，加埋八月內房股中期業績陸續出龍，依家大行估平均都有兩成至兩成五增長，在內外因素皆備之下，相信股價應可延續近日反彈勢頭，暫時上半年賣樓相對目標完成度最高的幾間內房，中國海外（00688）達80%，華潤置地（01109）及世茂房地產（00813）都係59%，碧桂園（02007）54%及融創（01918）52%，不妨望多兩眼，份業績有保證之外，話唔定見樓市形勢改善，趁機調高埋全年銷售目標都唔定。