昨日恒指終於收復二萬二千點，惟成交量未有配合，依然偏靜。（資料圖片）

七月份滙豐中國製造業PMI終值僅47.7，創下十一個月新低，但內地官方七月份製造業PMI數據卻企穩喺盛衰分界線之上，姑勿論數據參考性有幾大，但足以令人感到意外，加上人行喺短時間內再度放水，如今市場開始熱議下半年內地有機會減RRR，利好A股氣氛。滬綜指終於能企穩喺2,000點樓上收市，報2,029點，而港股亦一償所願，企穩喺22,000點樓上收市，報22,088點，可惜大市成交並冇異樣，主板僅468億元，都係平常心看待上落市。

昨日恒指終於收復二萬二千點，惟成交量未有配合，依然偏靜。（資料圖片）

阿莊100萬元投資組合

呢期唔少低殘股發力，好似造紙股同玻璃股，尋日理文造紙（02314）及玖龍紙業（02689）各升8%及12%，中國玻璃（03300）及信義玻璃（00868）各升12%及3%。此外，鞍鋼（00347）及馬鋼（00323）各升7%及4%，主要係市場憧憬工信部將加大力度關閉過剩產能，加上大型建設陸續啟動，有助消化庫存，加快供需關係正常化，而行業龍頭亦有望受惠整合潮。若然想追落後，重機及水泥股可關注，可留意安徽海螺水泥（00914）及中國龍工（03339）。

AV Concept炒味漸濃

騰訊（00700）呢期已成為不折不扣嘅強勢股，尋日升2.5%，收報360.6元。阿莊上月推介嘅中國安芯（01149），尋日創出五十二周新高2.54元，收報2.47元，升4.6%，近期A股熱炒智慧城市概念，可(目及)實中國電子（00085）。

指數高企，二、三線股及創業板股交投均轉趨活躍。尋日復牌嘅AV Concept（00595）股價曾升逾兩成至0.85元，收報0.78元，升11%，成交9,630萬元。事緣公司宣布以先舊後新方式按每股0.6元配股集資四千多萬元，雖然金額唔多，但亮點係承配人包括紅籌之父梁伯韜同阿里巴巴前行政總裁衞哲，其科網加創投概念足以吸引炒家目光。

之後隻股有咩搞作自然是股民最關心嘅問題，目前公司分銷半導體及消費類電子產品，日後圍繞互聯網及資訊科技範疇有新投資機會大，不妨等候消息。截至三月底止，公司每股NAV1.1元，呢次低價配股引入猛人坐鎮，會唔會炒到上NAV樓上先至會再有批盪收購活動，不得而知。但幾年前意馬（00585）獲紅籌之父入股，股價都只係炒咗兩個月就冇影，呢次隻AV Concept又會唔會咁短癮，阿莊冇水晶球，反正都係抱住超級投機心態看待，千祈咪表錯情！