市場憧憬內地樓市調控放鬆，加上城鎮化帶動需求，利好內房股。(資料圖片)

尋日係月結日，港股大部分時間交投淡靜，但僅尾市45分鐘成交已逾百億元，相信正係基金月結效應，恒指最終跌70點收場，報21,883點，主板成交487億元。今日係「超級星期四」，皆因英、美、歐央行議息，另中、美公布重要經濟數據及多家藍籌公布業績，且看其後大市方向會否漸趨明朗。

市場憧憬內地樓市調控放鬆，加上城鎮化帶動需求，利好內房股。(資料圖片)

雖然全球經濟復甦緩慢，但今年以來反映運費水平嘅波羅的海乾貨運費指數（BDI）卻已累升逾五成。瑞信最近發表嘅研究報告就預期，下半年BDI將可保持升勢，故給予航運業跑贏大市嘅評級，並睇好太平洋航運（02343）、中外運航運（00368）及中海發展（01138）。

本地樓市無運行

本港大地主出嚟話香港樓市正步入冬季，其實早喺特區政府出招打擊樓市炒風，以及新樓銷售條例生效，香港樓價雖然唔多點跌，但成交卻大幅縮減，已為入冬先兆，未來進入寒冬，意味離價量齊跌之日不遠。

第三季本地地產股如何為新盤定價，將成關鍵，尤其係今年上半年售樓收益已令人失望，即使以目前大部分地產股嘅資產負債表而言，財務狀況大致良好，但做生意最緊要貨如輪轉，下半年減價促銷會較上半年大，直接壓抑地產股估值。

反觀內地房地產市場似現轉機，事緣前屆領導人不斷話要壓抑樓價，到咗新一屆領導人上場，外界一直關注口風有冇變，直至本周二中共中央政治局召開會議，針對內房嘅字眼係「促進房地產市平穩健康發展」，市場解讀為有利內房市場發展。受相關消息刺激，佳兆業（01638）尋日升近8%、富力（02777）升6%及雅居樂（03383）升3%。如今投行亦在重申評估形勢，若然內房股擺脫緊箍咒而轉勢，則推動A股回勇嘅其中一個引擎有望恢復運作。

橫睇豎睇，如今內房股形勢勝本地地產股。要揀內房股，阿莊都係傾向唔大唔揀，中國海外（00688）同華潤置地（01109）都係實力之選，加上城鎮化帶動住屋需求增加，消費者對住屋質量要求同步上升，中海同潤地都有品牌優勢，正好迎合市場需求。今年六月中海外已完成全年銷售目標嘅八成，業績有保證。雖然公司近年似乎增加參與香港土地發展，但相對全國業務比重唔多，唔使過分擔憂。