九龍站環球貿易廣場大租戶包括大型投資銀行。(資料圖片)

歐美經濟前景唔明朗，好多金融機構都要有節流準備。有代理話，新地（00016）嘅九龍站環球貿易廣場（ICC）甲級商廈再有大型金融機構租客，攞啲樓面出嚟搵人要，最少涉及共5層高層，加埋約16萬方呎樓面，其中3層搵人分租，另外兩層就搵人頂租，該批樓面市值呎租70至80元左右，即加埋月租共約千二萬元。

九龍站環球貿易廣場大租戶包括大型投資銀行。(資料圖片)

世邦魏理仕沈燦城（右）看好九龍區商廈前景。

環球貿易廣場部分頂租及分租樓面資料

美國聯儲局早排話可能提早退市，歐洲經濟走勢依然唔穩陣，唔少金融機構都要開源節流。

有代理同劉Sir講，聽講ICC有大租客將部分租用樓面推出市場放租。

其中，有3層高層樓面以分租形式放出市場，每層面積約3.1萬多方呎，共約9.5萬方呎，市值呎租約70元；另兩層搵頂租嘅高層單位，每層約3.4萬方呎，加埋約6.8萬方呎，市值呎租高少少，大約80元；另外，有間投資銀行都諗緊將其中兩層搵人頂租。

ICC出租率高達99%

早喺今年五月嗰陣，彭博社早已爆料，話荷蘭最大金融集團ING正在拆租ICC兩層，涉及面積共約7萬方呎。而早排新地代理寫字樓租務部總經理盧經緯同劉Sir講過，ICC依家出租率達99%，呎租約70至90元，大租戶群包括摩根士丹利、瑞信及德意志銀行等。

同樣喺九龍區，東九龍商廈租賃前景就好好多。世邦魏理仕辦公樓服務部執行董事沈燦城（Terry）話，今年上半年觀塘同九龍灣優質商廈呎租升咗3.4%。

而長沙灣仲勁，期內升幅超過12%，佢話依家九龍區商廈空置率拉勻只約3%左右，估計下半年九龍區非商業核心區的商廈租金升幅應該有5%。

亞企買樓 首選英美

該行另一份報告就指出，亞洲機構投資者未來五年打算喺全球房地產投資嘅金額，就超過1,500億美元，但由於區入面可投資嘅產品唔多，佢哋或考慮英國倫敦同美國紐約等地。其實近排市場都有啲全幢商廈成交，聽講曾經放售嘅上環干諾道西7號全幢商廈，依家有個客出價傾到尾聲，涉資大約9,500萬元。