經過上月初嘅急升後，中國公共採購（01094）近日股價沿住10日線下跌，但連續三日喺低位0.51元有承接，有見尋日佢發盈喜，話公司會扭虧為盈，股價無升跌，收報0.59元，不妨小注跟進，唔大貪先睇前高位0.67元。

中國公共採購預期截至六月底止六個月將會錄得純利，原因係期內收益有所增加，去年同期則蝕4,891萬元。公司除咗獲批在深圳前海經營金融服務平台外，上周公布擬斥60億元收購電子化煤炭交易平台，料可同既有業務產生協同效應，而對方就同意截至一五年底止兩個年度從其主業所產生的除稅後純利總額唔會少過9.8億元。公司將以溢價（每股0.8元）發行普通股及/或優先股，或者雙方同意的其他形式支付，唔排除可刺激股價。

中國公共採購（01094）

阻力位：0.67元

支持位：0.51元