股海實戰：恆安 有勢再破頂

有指工信部正聯同有關部門研究化解產能過剩嘅工作，重點解決鋼鐵、水泥、電解鋁、平板玻璃和造船五大行業嘅問題。不過，見相關股份普遍低收，同樣產能過剩嘅煤炭股更急挫，兗煤（01171）跌近一成。一來股民聽呢啲消息聽得有點麻木，政策由研究到落實到見效亦需時；二來反映仍留喺缸中炒作嘅資金實在唔多，尤其過去熱炒中資股嘅「北水」斷纜，一向爛炒嘅表叔們幾乎絕迹魚缸。

西糖轉型成效待顯

個股方面，內地原料玉米價格持續高居不下，澱粉糖廠商叫苦連天，據講如今個別大廠產能利用率已降至低於八成，五成以上企業已近停產。難怪西王糖業（02088）早前宣布出售玉米加工業務，專注拓展內地物業開發業務。雖然業務轉型福禍難料，但面對行業困境，睇唔到前景，就惟有窮則變，變則通，只係變身內房股現效益前，現成同類股大大小小具業績支持嘅選擇實在太多，公司處轉型之初暫時難以吸引投資者目光。

講到原料價格，受經濟增長放緩影響，今年以來紙品需求下降，為紙品價格添壓，專門做上游嘅紙股影響較大，但做終端零售市場嘅消費企業，則可憑着本身產品多元化、全國品牌及產銷規模效益等優勢而維持經營表現。就如恒安國際（01044），今年以來嘅股價走勢對辦，現價84.45元，距離52周高位89.3元不太遠，表現令人喜出望外。

歸根究柢，公司三大產品：衞生巾、紙尿褲及紙巾業務均建立龍頭地位，三大業務互補不足，有助平衡市場風險，而公司喺控制成本方面亦係行業之冠，難怪基金鍾情。中績公布前，花旗及巴克萊先後發報告唱好，其中花旗更將其目標價調高至91元。

走勢上，近日股價10日線重上50日線，現黃金交叉，14日RSI處59，如能以大成交突破85元阻力位，有勢再衝52周高位，今年以來嘅重要支持喺250日線76.4元。