歐元兌美元走勢

今個星期聯儲局、歐洲央行同埋英倫銀行都議息,市場預期全部央行都繼續不變應萬變。聲稱係聯儲局線人嘅Jon Hilsenrath又放料話今次會議上維持債券購買計劃不變,即暫時債息都應該難以爆上,美元兌日圓自然暫時難以急升。

歐元兌美元走勢

至於歐洲央行,一直只聞樓梯響嘅「減息、負利率」等言論就成為市場焦點。近日歐元區經濟似乎見到見底訊號,留意截至上周二嘅外匯期貨合約,歐元淡倉由前周三萬七千幾張大幅減至兩萬多張,大家值得留意歐洲央行會否繼續暗示減息,唔好畀佢停繼續刺激區內經濟,此舉可稍為壓低歐元匯價,以免匯價出現過強情況,預期歐元仍舊試頂,但頂位目標仍只在1.3350至1.3400之間,本周筆者已不建議高追,反而應該睇位食胡,短線支持上移至1.3150。

本周三有美國第二季GDP初值、周五有每月一度嘅七月非農業新增職位同埋失業率,市場預期非農新增職位有18.5萬份,而失業率稍為回落至7.5%,咁多主題反而難以單邊炒上。咁多數據加埋一眾企業業績,市況好大機會只係「有波幅、無升幅」,美元上升大環境未變,今個星期就即管放長雙眼睇睇美元可唔可以扭轉近日頹勢,成為美元中線上升的一個吸納機會。