Fundman睇市：北水 買貨唔使急

睇番中金再生停牌前，揸住幾個巴仙的基金股東唔少，除劉央的Atlantis Capital外，有摩通、Norges Bank及Power corp of Canada等等。如果連基金都中伏，散戶就更加難避免踩到地雷。常言道，太陽之下無新事，依家整個股票市場以至中介保薦行，都希望以量取勝，爭取更多公司上市，可以肯定結果難免會良莠不齊，這類情況，可以肯定唔會係第一單，亦唔係最後一單。

講番個市，昨日結算前靜局依然，恒指跌118點報21,850點，主板成交額421億元，最厲害仲係日股喺零售數據表現麻麻底下，狂插468點或者3.3%，滬綜指亦跌34點報1,976點，近三星期低位。港股仲可以力撐去到結算前夕，今日七月期指埋單之後，係咪可以一直反地心吸力，應該會有答案。

港股恐被A股拖累

內地股市頗令人憂慮，先不談總理李克強的「保七」可能是市場一廂情願，睇番自七月中開始，一星期人民幣拆息掉頭回升，由3.6厘去番尋日5.06厘的七月新高位，雖然同上月錢荒高峰期的11厘比較仲有距離，但資金緊張情況似乎並沒有因李總的言論而紓緩，人民幣一年期不交收合約，由五月初6.19跌到六月底的6.33，在六月中稍為回升至6.26，近兩日又再跌過，昨日返回6.29，反映匯商對人仔一年後升值能力睇淡，加埋滬綜指由1,849點彈上2,092點，剛觸及五月開始跌浪的0.5反彈阻力2,091點後又再跌過，估計港股八月未必叻得去邊，最怕係被A股拖後腿。

個市來來去去都係炒內地網股，騰訊（00700）昨日創過355.8元新高，老友提醒，仲有李克強多次提振興消費，發展環保。環保股份確係悶市中企得硬的板塊，好似北控水務（00371），昨日仲創五十二周新高3.17元，今年累積升五成九。

先講基本因素，北控水務主攻污水處理，同時從事食水供應，月中公司簽訂諒解備忘錄，收購36個污水處理項目，成事與否估計周內有消息。國家鼓勵環保及發展污水處理，唔少項目以BOT形式畀外資競投，污水處理屬於資本密集生意，北控水務一大優勢是有大股東北京控股（00392）撐腰，為爭取融資提供方便，亦唔使擔心搵唔到項目收購機會。

北控水務過去三年業績增長不俗，去年賺7.5億元，但估值也充分反映其優勢，往績市盈率29倍，預期市盈率22.2倍，如果以PEG低於1的標準，集團是剛剛達標，估計未來兩年盈利增長介乎20至23%，如果早前公布的36個污水項目成功收購，有機會進一步刺激股價，由於交易作價四至六成以新股支持，每股2.82元，為未來幾個月提供重要參考，筆者認為較適合在股價跟隨大市向下，先慢慢收集未遲。