股海實戰：百麗 候低炒上落

內地周四公布官方製造業PMI，市場預期將會跌穿50，但查實滙豐嘅相關統計數據早已顯示出經濟增長放緩趨勢，官方數據反而滯後，即使真係跌穿盛衰分界線，理論上市場早已反映實況。反而，審計部門着手審計地方債務嘅消息，引起極大不安，皆因牽涉龐大嘅地方利益。不過，當今領導人明知山有虎偏向虎山行，皆因地方債問題持續不受控嘅話，最終會影響中國嘅國際信貸評級，正所謂「長痛不如短痛」，與其等，不如主動引爆及清理，但呢個過程需時兼痛苦，惟有戒急用忍！

消費市道不如前

指數表現暫難寄厚望，即使沾手個股，亦宜重有國策同基本因素支持嘅板塊，以盡量降低風險。尋日阿莊話市況有變會減倉，一如計劃晨早沽出滬杭甬（00576）3萬股，若要再進一步增持現金，會考慮沽出上實（00363）。

板塊方面，體育用品股由上月低位反彈累升幅度不少，龍頭股安踏（02020）便由低位6.33元反彈至本月高位8.76元，累升幅度有38%，有貨在手可以考慮逢高減持獲利。同樣屬內需範疇，百貨股表現相對落後，其中百麗（01880）股價由年初高位18.58元回落至本月初低位見9.83元，累跌幅度達47%，尋日股價表現逆市做好，收報11.42元，升2.1%。

綜觀大行睇法，普遍認為百麗採取激進嘅減價促銷行動，令利潤率下降，今年盈利表現存不明朗因素，但由於公司現金流較強，且在銷售網絡及品牌多元化方面嘅競爭力勝同類股，故評價偏向中性。阿莊就認為，今年內地樓市同股市表現都唔得，消費市道失去資產升值嘅財富效應支撐，點都會差啲，目前估值亦正反映呢份預期。

以百麗現價預測市盈率約16倍，已回落至相對合理水平，但再上必須要有經營數據改善作支持，且觀望第三季是否有回穩迹象，此前料股價維持喺10至13元波幅區內，只宜候低炒上落，可待回落至10元邊或以下分注收集，12.5元樓上逢高減持。