老牌發展商求變，成立65年嘅協成行，其董事總經理方文雄（David）話，公司發展趨多元化，手頭有兩個工廈活化同重建項目，分別喺黃竹坑同觀塘，仲有一個筲箕灣住宅項目諗住出年賣。近年將收租物業優化，其中4幢寫字樓部分單位，添上網同辦公基本設備出租，統一以「Office Plus」為品牌，新租同舊租有6、7成升幅。

協成行方文雄表示，「Office Plus」寫字樓工作單位月租九千元起，較前租金有六、七成升幅。

協成行旗下物業最新發展

協成行董事總經理方文雄（David）同劉Sir講，協成行近年都走向年輕化，原因係企業一定要更生求變，唔可以單靠食老本，公司五年前已開始逐步喺上環福樹商業大廈、灣仔華創大廈、旺角高明商業大廈及協成行旺角廣場開始，將部分單位轉型為服務式辦公室，加埋有約250個工作單位，已經租出近九成。

攻中小企 租期有長短

佢話該250個單位總樓面約16萬方呎，目標租客係中小企及初次創業者等，提供附設辦公室裝修及設備嘅寫字樓，簽約後一日左右就可以即刻開業，工作單位容納兩個人都有，月租由9,000至5.5萬元不等，租期六個月至兩年。同時，亦推出「The Collab」的綜合會議及工作空間。

筲箕灣盤 明年賣現樓

David仲話，會考慮將有關元素引入黃竹坑道33至35號好景大廈工廈活化項目，最快出年第二季落成。

至於該集團旗下嘅觀塘興業街27至29號工廈重建項目，由於區內補地價太貴，所以依家會重建上址為現代化工廈，而筲箕灣東大街21至27號Le Riviera住宅項目預計明年八、九月以現樓形式推售。

另一方面，商舖劏場競爭大，業主要諗計突圍。代理話，荃灣地皇廣場商場劏場舖位，業主尹柏權短期重售部分取消交易單位，並諗住將兩年每年五厘回報保證，再加多第三及四年每年七厘回報，仲加獎金5,000元畀開單代理。

北角城市金庫業主中建電訊（00138）公布，該項目開售至今累售店舖售價共約5.89億元。尖沙咀加拿分道雙號舖連地庫獲個人護理用品店續租，新租金近270萬元，料升約一倍。