澳元兑美元走勢

美國最大抵押貸款銀行富國銀行同摩根大通業績比預期好，不過他們都表示如果美國按揭利率維持在高位，再按揭嘅需求可能會大跌30至40%！自從按息上升，過去九星期新增房貸宗數就有八個星期下跌，可想而知銀行家既警告唔係無的放矢。

澳元兑美元走勢

不過，伯南克開金口，股市就推高，但按息未見顯著回落，所以同香港一樣美國樓市風險同樣需要提防，亦都造就美元先行調整。

一眾外幣繼續借呢個空檔期反彈，其中彈得比較明顯的有澳元。其中公布七月會議紀錄就睇到澳洲央行指澳元下跌將推升通脹，仲需要時間觀察減息後嘅效果。由於央行仍然預期澳元會繼續下跌同埋低息會進一步發揮作用，所以即時令八月減息的預期降溫。不過，筆者一路都唔覺得澳央行要急到八月份減息，尤其係九月十四日就大選，央行應該都唔會有咩大動作。

基本因素上，美元強勢、中國經濟仍在試底，好在中國第二季GDP未有低於7.5%，而澳洲六月份失業率升至5.7%的四年高位，反映自身經濟亦都唔好，所以短線唔減息可以令澳元暫時鬆一口氣而彈一彈，但仍舊係「有反彈、無轉勢」格局，維持睇法最叻應該係抽番去0.9420至0.9500，支持分別在0.9120及0.90。