股海實戰：頁岩氣股 短炒無妨

上周推介過嘅龍源（00916）守穩8至8.2元承接區，擬跟進兩萬股。中燃（00384）連日受制，遂先行沽出，短線成功考驗10日線8.55元支持可翻兜。

頁岩氣及油服股經歷多日沽壓後，尋日個別有反彈，其中安東油服（03337）及巨濤（03303）分別升6.3%及5%；海隆（01623）由低位4.13元反彈上4.48元收市，升0.45%。不過，弱勢嘅繼續弱勢，宏華（00196）及山東墨龍（00568）同以2.2元收市，跌幅均逾1%。

中國處起步階段

唔少揸住呢類蟹貨嘅股友問，可唔可以溝貨。要知道，觸發今次頁岩氣及相關股份大幅調整，乃緣於當局將本來預期喺年底前頁岩氣探擴招標延至明年。頁岩氣作為新興能源「明日之星」，投資界基本上冇咩異議，英國財政部最近便將頁岩氣開發收益稅率由62%大降至30%，以鼓勵開發。不過，以美國開發頁岩氣多年為例，成功要取決時間、技術、地理等因素。

中國唔係缺乏資源，而係需要時日掌握技術，之前相關股份熱炒，係憧憬政府招標探礦權帶動行業投資。惟結果係，以第二輪招標為例，據聞十九個區域探礦權批出後，中標企業才發現探礦工程困難，成本較預期高，加上中標企業大部分屬「新仔」，缺乏經驗同技術，唔知點樣入手，結果唔少都仲未開工，部分更索性轉讓探礦權。咁嘅景況，難怪官方推遲新一輪招標工作，相關股份投資熱情由熱轉冷亦係必然結果。

長線投資新興行業股份確實不乏令人致富嘅例子，但呢類「長征」須要有眼光同耐性。長遠睇頁岩氣廣泛使用或可帶領美國經濟成功大翻身，但刻下呢個局面尚未出現。

中國起步遠落後美國，要從投資呢個領域而得益實在係漫漫長路。暫時嚟講，呢個板塊，純綷跟風、睇技術分析同因應股份流通量炒作並無不可，但中長線投資也許要有待更多條件成熟，始有足夠理據行事。