尚家生活方文彬（左）表示，yoo Residence耗資五千萬元設計及裝修三個示範單位。右為該公司銷售及市場部高級經理柯穎豪。

夏日炎炎嘅八月份就快嚟到，今年受一手銷售新例影響，下月新盤市場分分鐘會由傳統暑假淡季變成推盤旺季。單計五大發展商有機會開售嘅新盤，涉及已達2,435伙，勢創新例後單月新高。其中信置（00083）主打海景大宅嘅大埔海鑽．天賦海灣，樓書有機會隨時突擊面世；而新世界（00017）元朗溱柏提供1,620伙，勢成今年暫時登場最大規模項目。

尚家生活方文彬（左）表示，yoo Residence耗資五千萬元設計及裝修三個示範單位。右為該公司銷售及市場部高級經理柯穎豪。

yoo Residence的裝修示範單位屬一房間隔，實用面積約355方呎。

下月主要部署開售新盤

事實上，今年夏天嘅天氣相當悶熱，但點都唔及一手銷售新例後嘅新盤市況咁悶。根據一手銷售資訊網資料，自從四月二十九日新例全面生效後，截至昨晚，全港亦都只係有18個樓盤已經推出咗樓書，當中仲要包括不少貨尾盤，證明新例實施後發展商推盤意欲真係跌至歷史谷底。

不過，隨着新例生效就快接近三個月，發展商應該都已經大致掌握同適應新例要求。

海鑽或下月賣現樓

劉Sir聽聞八月將會成為各大發展商嘅大旺檔期，其中信置早於新例實施前已經開放現樓示範單位畀人參觀嘅海鑽．天賦海灣，據聞樓書籌備工作已進入最後階段，有機會突擊派發，該盤亦可望短期內取得滿意紙，下月以現樓形式賣。

至於新世界亦部署食住元朗溱林熱銷，最快下月開售同區大型新盤溱柏，該盤提供1,620伙，間隔由開放式細單位到四房大宅均有提供。據一手銷售資訊網資料，溱林首度出現兩伙取消交易個案，單位為1座3樓D室及9座G樓C室。

講開積極推盤，資本策略（00497）旗下尚家生活董事總經理方文彬話，佢哋响沙田九肚第56A區B5地盤，啱啱批咗起二十間屋，面積二千到四千呎，計劃今年申請樓花預售，最快明年第三季內開賣。至於星期四賣嘅銅鑼灣yoo Residence，如果50伙賣晒，應該套現到七億半；而渣甸山白建時道47號項目會起分層單位，大概15至20伙，今年批到就會賣。

次季新盤貨尾大增

另外，中原黃良昇話，受政府辣招打擊，部分豪宅新盤銷情欠佳，截至第二季貨尾量約6,535伙，比重上升到14.6%，比重創九年半以來按季新高，其中以元朗區佔1,977伙最多。