富智康近年改變策略，減少對單一客戶的依賴，未來毛利率可望持續改善。(資料圖片)

財政部部長樓繼偉話今年中國不會有大規模財政刺激政策出台，叫仍奢望下半年中央出手救市嘅好友死心，但近兩個月股市表現某程度亦反映中央取態，故見尋日兩地股市未有大變動，港股繼續窄幅上落，恒指升59點收場，大市成交484億元。

富智康近年改變策略，減少對單一客戶的依賴，未來毛利率可望持續改善。(資料圖片)

市場觀望伯老講話，華潤系牽涉疑似高層貪污事件成為焦點，主角潤電（00836）股價急挫一成，同系華創（00291）、潤泥（01313）、潤地（01109）、潤燃（01193）跌0.4至3.5%不等。有分析指，其實潤電交易起爭拗一事已逾年，此前小股東聯盟更狀告至高院，但如今被內地官媒記者實名舉報並點名質疑，手法罕見，事件演變成一宗中企高層涉嫌貪污嘅疑案，更令人揣測是否內地金融業整肅之風已吹到紅籌老總身上。執筆期間，據講有官媒網站已刪去有關文章，畢竟華潤系有三隻股份為藍籌股，事態發展如何股民定必關注，就擔定櫈仔等睇戲！

北控水務壯大規模

新能源股及光伏股現回吐，水務股光國（00257）曾高見6.99元，收報6.83元，跌1%；同類股北控水務（00371）向標準水務收購36個水務項目，代價約17億元，其中四至六成擬以發行代價股份支付，每股作價為2.82元，餘額以現金撥付。記得○九年標準水務曾申請在港掛牌，後來因核數師同保薦人辭任而未有成事。若今次交易順利完成，北控水務嘅業務基礎將進一步壯大，喺板塊中與光國平分秋色！

手機零件股瑞聲（02018）逆市跌半成，事緣有傳iPhone5S或未能趕及喺九月出貨。不過，見到代工商富智康（02038）（前稱富士康）股價硬淨，高位做4.17元，收報4.08元，升2%。富智康股價由一○年初高位10元樓上，碌到落去年低位僅2.22元，但期間主要客戶蘋果公司產品卻大賣。為改善業績，近年公司改變策略，主力擴闊客戶基礎，減少對單一客戶嘅依賴，年內毛利率有望持續改善，相信此舉對蘋果公司訂單影響亦有限，畢竟能與富智康競爭嘅同業十分有限。

走勢上，其股價已回補五月下旬嘅上升裂口，近日重上10日線樓上收市，短線若能以大成交突破五十二周高位4.45元，中線阻力位上移至5元關，回吐宜守穩50日線3.8元之上，且看公司改名能否改出個好運來！