胡詠詩認為，香港作為國際大都會，不少類似J．CREW嘅大型品牌都積極來港開店。

歐美經濟「麻麻地」，唔少大品牌都趁香港舖租放緩，越洋到港開店，連美國第一夫人米歇爾都係佢哋「粉絲」嘅J．CREW，籌備喺香港開旗艦店，諗住喺香港一線街搵面積約萬呎舖，若果成事，將係該品牌在亞洲首間旗艦店。高緯環球香港商舖部執行總監胡詠詩話，香港一線街舖租金已見頂，唔少國際大品牌都伺機嚟港。

胡詠詩認為，香港作為國際大都會，不少類似J．CREW嘅大型品牌都積極來港開店。

J．CREW

國際時裝品牌搶灘本港一線舖位個案

近排內地旅客喺香港買嘢消費，都以日常用品為主，Michele同劉Sir講，唔少鐘錶金行都審慎開新舖，一線街租金自然受壓。

中環銅鑼灣舖租俱跌

中環上季平均呎租約1,480元，比同年初跌咗2.6%，睇怕今年仲有1%跌幅。銅鑼灣上季平均呎租1,950元，比今年初就跌咗2.5%，料今年再跌1.5%。下半年佢就睇好旺角，相信會有1%升幅，上季該區平均呎租大約1,000元。

依家一線街舖租金雖然放緩，但唔少大商戶都無大肆擴充，反而部分從未喺香港有店舖嘅國際品牌，就睇好亞洲區零售市道，伺機進駐，其中上述J CREW早排已經做定功課，計劃來港開旗艦店，依家未定租邊個區舖位，但面積大約1萬呎。

J．CREW呢個品牌最為人熟悉係米歇爾都着，最經典係奧巴馬連任就職果日，佢老婆都着住該品牌衣飾出席。另有代理話，尖沙咀北京道71至77號地下部分畀間眼鏡店租咗，月租金約53萬元，同前租金比只升30%。

睇番本港商廈租賃依然麻麻，高緯環球香港商務部執行總監霍佐平就話，今年上半年商廈新租賃面積只210萬方呎，同舊年下半年比跌超過6%，而期內每宗平均租用面積細咗，反映大企業租賃活動少咗。

東九龍商廈呎租反升

中區超甲級商廈上季平均呎租只103元，同今年初比跌1.1%，估計下半年仲跌多4%，係全港商廈跌幅最大地區。至於東九龍商廈上季平均呎租超過32元，同今年初比大升7.4%，下半年仍有2%升幅。