Fundman睇市：中石油 有再升空間
近期港股拍晒烏蠅，大戶乘機上下其手，令個市走勢飄忽到暈。昨日早市恒指一度炒上21,000點關，之後內地公布六月進出口數字，同大行估計差天共地，十點開始個市走晒樣，並一度倒跌，直到一點半左右，A股突然拗腰狂抽2.2%收市，港股亦乘機炒番上去，恒指收報20,904點，有221點進帳，但期指客明顯做兩手準備，尤其今晨會公布美國聯儲局議息紀錄，同埋伯南克會發表講話，七月期指收20,857點，由前日高水變成低水47點收市。
太陽日誌 2013/7/11
渣打證券預測中石油業績（人民幣）
基金密吸地產股
近幾星期本地樓市量跌價升，大行估計市場適應辣招影響後，今年樓價跌5至10%。睇番今年恒生地產分類指數，一月見頂至今累積跌18%，應已反映樓價中短期見頂的因素，連中大型地產股重估後資產折讓都接近兩成，近日見基金密吸。始終祖國經濟未見谷底，芬佬無辦法唔搵番本土概念股去博一博，恒地（00012）升0.8%，新地（00016）升1.3%，長實（00001）升2.6%。睇番地產分類指數再彈多5%左右先至去番250日線，主觀睇感覺地產股短期反彈，亦應該至少有番咁上下嘅幅度。
美國先後推QE1、2、3，傳統智慧話印銀紙會刺激商品價格，但紐約期油自○八年海嘯前高位147美元，撻到落32.4美元之後，打從一○年開始，經歷多次量寬，亦僅在75至115美元之間上落，短線波幅仲愈收愈窄。今次美國超低息環境下，能源價格唔升，一來因為以中國為首嘅餓油國家，需求隨着經濟疲弱而回落，再者，美國近年頁岩氣開採進展迅速，對能源價格有明顯降溫作用，目前天然氣價格只及○八年高位的四分之一，國際煤炭價格亦比一一年高峰期跌掉接近一半。
近三年以三角形走勢運行的油價，近期似有破位徵兆，執筆時紐約期油見過104.87美元的一年新高，原因應該唔止埃及局勢緊張咁簡單，看來係商品投資者認定美國經濟復甦，亦相信歐、日及中國經濟已渡過或快將接近黑暗盡頭，那升勢便可解釋。
近日中石油A股連升九日，尋日停一停，中石油（00857）H股亦由半個月前低位反彈一成八。綜合大行預測中石油一三年市盈率10.2倍，同歷史市盈率11倍仲有約7.3%折讓，國際油價若展開新升浪（可以升穿110美元為確認），暫時頗被低估的業績有重估條件，短期股價或仲有一至一成半的潛在上升空間。
