股海實戰：中視金橋 貨源歸邊

內地致力打擊假出口，剛公布嘅貿易數字遠遜預期，其實並不令人感到意外。投行中金話內地經濟其實早已硬着陸，仲話進出口貿易數據將持續疲弱。如今睇嚟，人行唔會因為「短痛」而放水經已係市場共識，投資者要做好心理準備，嚟緊要再「硬食」一系列差強人意嘅經濟數據。如此情況下，尋日A股低位反彈就顯得有點撲朔迷離，聽表叔講有神秘大盤掃起兩桶油同四大行，會唔會係國家隊入場做嘢，不得而知，但即使真係，亦唔好抱太大期望，宜繼續以平常心看待淡市。

過氣板塊反彈乏力

阿莊一路喺度等機會買入券商股，但中信証券（06030）同海通證券（06837）都唔肯回，尋日股價分別升4%及2.6%。考慮到市況飄忽，盡量避免高追，惟有暫時當睇佢唔到。升市之下非指數成分股被冷待，尋日提及嘅電池股逆市低收、新能源股亦見沽壓，頁岩氣股亦同樣不濟，總之昔日炙手可熱嘅中資板塊，如今喺急跌過後仍反彈乏力，確令股民神傷！

針對板塊行事嘅策略已不再奏效，轉而留意個別強勢股。中視金橋（00623）股價表現可謂跌市奇葩，無論係今年以來抑或最近兩個月，股價表現均跑贏大市，五月以來累計升幅更達八成，尋日曾創新高7.29元，收報7.14元，升3%，成交3,967萬元。

點解可以咁「屈機」，從基本面睇，公司近年行「三屏」戰略，構建覆蓋電視、手機及互聯網嘅業務平台，隨着內地智能手機日益普及，業務模式可吸引基金目光。再睇數據，去年度現價往績市盈率10倍，息率3.7厘，假設今年上半年整體業務表現只係平穩，估值亦有數得計。不過，阿莊就認為，其股價強勢與貨源歸邊亦不無關係，事緣去年十月開始逐步減持中視金橋股權嘅貝恩資本，喺今年五月上旬已沽清持股，相關沽壓已完全消除，喺貨源歸邊下，促成股價呈反地心吸力，反覆向上。有智慧不如趁勢，小注短炒並無不可，至緊要Set定止蝕位，技術上，保力加通道頂部阻力喺7.4元，支持位可參考10日線6.7元。