億京的九龍灣常悅道1號商廈項目總樓面約26萬方呎。（資料圖片）

「辣招」出籠打亂唔少發展商賣樓部署，令上半年售樓收入大減，踏入下半年，大家都積極追番上半年條數，聽講單係新地（00016）及會德豐地產等共5個發展商，最少有6個工商項目好快推出市場，其中，億京發展仲諗住下半年連推兩個商廈盤，包括九龍灣常悅道1號及長沙灣億京廣場2期，其中常悅道商廈將以現樓形式發售，意向呎價逾1萬元。

億京的九龍灣常悅道1號商廈項目總樓面約26萬方呎。（資料圖片）

預計推售的工商新盤

東九龍商廈市場本身已經好旺，加埋啟德郵輪碼頭效應，區內業主叫價自然進取，今年初至今都未有商廈新盤賣嘅億京發展，計劃响下半年推兩個商廈新盤，其中常悅道1號商廈項目，物業已經落成，樓高38層，總樓面約26萬方呎，正進行緊內部裝置工程，發展商之前意向呎價逾1萬元。

常悅道商廈現樓發售

預計好快可獲批預售文件嘅億京廣場2期，每層面積約莫1.1萬方呎，有代理同劉Sir講，由於區內好耐冇同類新商廈賣，售價會以東九龍做參考，相信呎價約1萬元。

同樣喺附近有商廈起緊嘅會德豐地產，佢哋嘅海濱道83號商廈地盤，繼其中One Bay East西座今年四月以45億元賣咗畀宏利人壽保險後，有代理話收到風，該盤另一幢在建中的商廈都有機會今年推售，諗住先全層形式拆售，估計呎價可逾1萬元，該幢樓高大約21層，總樓面超過50萬方呎。

海濱道項目擬末季推

近月觀塘區商廈樓花呎價破萬元，臨海商廈做價更可看高一線，有代理話，新地（00016）同王氏國際（00099）或有關公司合作嘅觀塘海濱道181號商廈樓花項目，原本諗住今年初推售，咁啱遇上「辣招」出籠，發展商惟有等吓。

聽講該盤已計劃第四季推出，由於該廈擁全海景觀，估計呎價最少約1.2萬元。項目總樓面約30萬方呎，新地佔較大業權。