澳元兑美元走勢

美元資產一枝獨秀，上星期五高收，兌所有主要外幣幾乎全部破位，一方面建基於退市預期，另一方面一眾外幣又唔爭氣。上星期英國第一季GDP由增長0.6%下調至得番可憐的0.3%，記得當時英鎊炒起的催化劑就係呢個GDP數據初值，話英國避免咗三底衰退，當時筆者已經忠告GDP數據可以修正，而且0.6%嘅增長亦稱唔上係好數字，結果英鎊最低跌至1.51中位，暫時仍舊保持弱勢。

澳元兑美元走勢

就業數據成關鍵

不過美元能否一枝箭再上衝，其實有一定變數，雖然筆者仍看好美元，不過炒外匯有時要計值博率，依家開盤其實相當尷尬。要是美國失業率繼續遠離7%而新增職位不足20萬份，雖然未至於令市場扭轉美國退市大方向，不過要美聯儲喺九月中即刻減少買債規模嘅機會就減低，不利美元短期走勢，外幣有條件進行反撲，如果要博外幣反彈，一定要揀一隻跌得最殘，其中澳洲紙係筆者開始留意嘅貨幣之一。

睇番澳元四月中在1.0580開始下跌，短短兩個半月跌足1,400點子，再急跌的空間已經有限。既然筆者睇好美元，即澳元仍傾向下跌，不過短線已有初步條件進行反彈，尤其係上周五更跌穿0.9135重要技術支持，以全月最低位收市，反映要大幅反彈動力未夠，不過筆者預期短線喺0.9000水平該有力一守，預計澳元可於七月先翻翻身。

睇番外匯期貨，澳元淡倉雖然維持在高水平，不過未有進一步增加，都印證筆者覺得澳元初步靠穩嘅觀點，若果今個星期兩大誘因：澳洲央行未有減息而美國就業數據未如理想，或可短線令淡友先行收手。預期今個星期區間以0.90至0.93為主，跌至0.908水平小注博反彈，跌穿0.90止蝕，目標0.9250。