Fundman睇市：吉汽 不妨現價上車

數據告訴我們，內地經濟情況的確幾令人擔心，尤其官方數字都跌到接近50的緊縮臨界點上，近日魚缸友都買定花生，等阿爺開水喉救亡。但睇番周末時，國家主席習近平出席北京召開的中共全國組織工作會議，會上表明今年將民生改善、社會進步、生態效益放在考核內容，不再簡單以GDP增長論英雄，如果加埋上星期「人民日報」指證監及央行唔係股民奶媽的言論一齊睇，經已係畫公仔畫到出腸，叫大家死咗條心，政策唔會放鬆，央行亦唔會放水。

史提芬可以推斷，內地第三、四季GDP保得住7.5%嘅機會愈來愈細，不過，A股向來都係估佢唔到，尋日咁嘅環境下，竟然都可以先跌後回升，滬綜指以全日最高位收市，報1,995點，升16點，完全漠視壞消息。

內地水緊情況改善

由此可見，今年表現較歐美股市大落後的A股，確係有可能見底或者接近短期低位。而即使人行唔肯高調放水，但尋日上海同業拆息全線回落，似乎半年結完結後，內地銀行頭寸的確鬆番唔少，睇走勢，A股短期有機會彈番上10日線，即2,041點附近。

最近美國聯儲局主席伯南克進一步確認退市將至後，美債息由2厘樓下抽到上周初最高見2.657厘，近日在2.5厘水平橫行。但睇番美股恐慌指數VIX，卻在近幾日率先由高位21.9見頂回落（上星期五去番16.86），對上一次VIX見頂係去年十二月底，去到23.23，之後拾級向下去到三月的11.05，債市反映市場對退市恐懼未完全減退，但「恐慌情緒」卻有提早見頂迹象，如果短期道指能夠重返50日線15,041點樓上，可視為市況轉穩的一個訊號。

內地汽車股今年二月見頂之後，到五、六月跌勢明顯加快，但細看多間公司的銷售數字，其實並非太差，傳聞中的進口豪華汽車奢侈稅，雖對一班用開法拉利的煤礦礦主只係濕濕醉，但對部分針對消費級別車種的國產品牌，仍然是有實際得益，變相提高了售價的競爭力。

吉利汽車（00175）屬於內地四大自主品牌之一，擁有「帝豪」、「全球鷹」及「英倫汽車」三個主要品牌，合共三十多款乘用車種。集團今年首五個月的汽車銷量22.89萬架，按年增長22%，比內地乘用車銷售的15%增長理想，也完成了全年目標56萬架的四成一左右。下半年，除了1.3公升的小型車款EC7外，仲有兩款主攻15萬人民幣價位的七座SUV及MPV車款EV8及EX8，其市場反應，將是銷售能否達到全年目標的關鍵。

最近吉汽股價被洗至3元樓下，低見2.98元，對比二月份高位4.75元，最多累積37%跌幅，相對首五個月的銷售數字，確實有點背馳。

吉汽現價一三年PE不足9倍，較歷史中位數12倍為低，以今、明兩年業績預期有22%及16%增長計，估值頗被低估，股價看來已見了一個中期低位，以不高於3.4元入市，中線目標睇4至4.2元唔過分。