股海實戰：前海概念股 有鑊氣

魚缸中人，必須要懂得認清大環境，特別係國情。六月內地官方製造業PMI跌至50.1%，逼近盛衰分界線。別忘記六月銀行同業拆息出現大幅波動，此後銀行必要重新審視流動性，放貸政策有調整，對實體經濟影響將逐步浮現。

要知道，今次上大人不惜容忍經濟增長放慢亦要調整政策嘅決心係路人皆見，牽涉整肅政、經系統亦必然會引發既得利益者嘅反彈，地方與中央尚會有一番角力。喺咁嘅局面下，下半年經濟能保持相對平穩經已係唔錯，A股喺暴風雨後以休養生息為主，直至IPO有重啟嘅條件始現曙光。

21500點阻力大

至於港股，恒指市盈率落到唔夠十倍，冇錯估值已屆相對低嘅水平，但記得眼前內地嘅信貸危機亦係前所未有，且仍處於「拆解」過程當中，加上次季大量資金流出新興市場之後，難望喺短時間便回頭。技術上，恒指主要波幅區已下移至19,000至21,000點水平，相信反彈至21,500點水平將遇重大阻力。看官宜審慎控制持倉風險，盡量以中長線投資心態看待。

講番板塊表現，上周五前海概念股異動，深圳國際（00152）及招商局國際（00144）均升4%、中集集團（02039）升9%。事緣上周深圳公布前海區綜合規劃，市場憧憬內地對經濟有保有壓，喺整頓金融體系嘅同時，前海發展將提速前進，相關股份因而受惠。

值得留意，據前海地皮開發方案，前海區內地皮擁有人並冇優先開發權，日後須與其他發展商站喺同一起跑點再重新競投。不過，正所謂「猛虎不及地頭蟲」，招商局同中集都喺深圳發展多年，而深國更係深圳市窗口公司，即使前海地主冇優先開發權，亦唔影響佢哋喺前海尋求新投資嘅機會，而整個地區經濟蓬勃發展，公司業務亦必可受惠。

聽聞本月尚會有多個前海政策陸續出台，不排除短期板塊氣氛仍可保持暢旺。今次公布嘅綜合規劃中，中集持有嘅地皮正處首批土地開發項目嘅金融核心地帶，難怪股價表現突出。論走勢，上周中集股價由低位10.82元反彈上高位見13.4元，暫宜先觀望50日線12.5元水平承接，守穩其上，反彈可持續，下一阻力位喺14.4元；否則的話，待再試11.8至12元再作部署。