將於本周五截標的將軍澳限量地（虛線內），遭測量師行大幅調低估值超過一成半。（資料圖片）

將軍澳第68B1區限量地啱啱喺上個禮拜以震撼破底價賣出，隔籬嘅第68B2區限量地緊接今個星期五截標，劉Sir都知呢幅係區內最臨海嘅地皮之一，但市場信心經已動搖，先後有多個測量師調低地皮估值，包括有美聯測量師行、高緯環球同第一太平戴維斯，最高減幅多達約17%，地皮估值下限約34.24億元，每方呎樓面地價只約4,000元，屈指一算庫房隨時少收近6.9億元。

將於本周五截標的將軍澳限量地（虛線內），遭測量師行大幅調低估值超過一成半。（資料圖片）

本周截標的將軍澳限量地估值大減

今次截標嘅將軍澳第68B2區限量地喺全區「最南端」，有無遮擋全海景，加上係區內供出售嘅最後一幅土地，市場原本幾睇好，估計每方呎樓面地價最高4,800元，估值約41.1億元；但貼住後面幅限量地，剛由華懋以全區最平樓面呎價約3,654元投得，拖累第68B2區地皮估值「大插水」。

美聯睇最淡 估低17%

好似原先睇得最好嘅美聯測量師行，今次毫不留情咁大劈估值，該行林子彬話，第68B2區限量地價值難免受上周低價賣地影響，但始終有全海景優勢，料樓面呎價有約4,000至4,200元；估值最少約34.24億元，比起原來估算約41.1億元，足足唔見咗近6.9億元，減幅約17%係全行最多。

高緯環球張翹楚都同劉Sir講，美國計劃退市加上貼鄰地皮以創新低價批出，發展商出價睇嚟都會轉趨審慎，所以樓面呎價由原先估計約莫4,700元，減約15%至4,000元。

維景灣畔累劈百一萬

另方面，大嶼山長沙嶼南道迷你住宅地都會喺星期五截標，不過業界就未對地皮估值作出調整，目前估值約3,406萬至3,715萬元，樓面呎價約5,500至6,000元，同區內經已批出嘅土地價值相若。劉Sir預期除咗主要發展商外，呢幅嶼南道迷你地都可以吸引其他個人投資者或用家入標。

將軍澳地低價賣出，中原柯勇話，全區過去三日假期都只係有8宗二手買賣成交，交投明顯放緩，其中維景灣畔1座中層海景戶，先後累減110萬元，終於以990萬元賣咗，之前同類成交價要1,000萬元。