Fundman睇市：中國電力 可追落後

一些客觀因素反映，環球市場可能已捱過最驚濤駭浪的幾日，恒指恐慌（波幅）指數由星期高位30.18，去到尋日的23.68；十年美債息連續兩日回落，目前在2.49厘水平，人民幣隔夜及一星期拆息，亦由上周高位13.44及11厘，分別回落到5.56及6.68厘水平，之不過恒指短短三日內由低位19,426點升到尋日高位20,713點，累積反彈1,287點，假如過去兩日無買過，仲追唔追？確係一大難題，唔少投資者都抱住極短線的即食心態。

尋日電力股整體走勢標青，一來消息指秦皇島有700萬噸煤晒緊太陽，比五月中大升29%，電廠平均煤炭庫存由15日升至23日，加埋上半年水力發電量升近11%，成個中環睇死煤價仲有排要跌，其次係市場預期下半年內地電力消耗量會掉頭回升。電力股今浪由高位跌得咁誇，估計基金要撈底，都應該會係首選，其次先輪到環保能源股，當中可以留意華能新能源（00958）及大唐新能源（01798）兩隻。

潤電（00836）尋日走勢凌厲，單日升幅6.2%，為藍籌股之冠。由於收購潤燃（01193）的股東會押後，故筆者仍等緊機會。至於煤價敏感度最高的華能（00902），升6.5%，反而今年水電火電收入都估有唔錯增幅的中國電力（02380）尋日得3.3%進帳。睇番大前日，股價被洗到落2.41元，剛好在250日線上面剎停，將四月中以來的累積升幅一鋪清，一三年PE得7.8倍，短期上番3至3.2元應難度唔大。

本地券商股有得諗

今日半年結，恒指同去年底的22,656點比較，跌緊一成，不過成交旺番，首五個月日均有682億，按年升16%，查實點都應該要睇番港交所（00388），可惜大孖沙怕佢買LME的收購摸頂，短期業績亦難免有攤薄效應，其實今年本地券商股真係唔錯，耀才（01428）及海通國際（00665）今年股價累積升37.7%及8.4%，跑贏大市，如果生意同大市成交同步，一三年預期市盈率好大可能落番去8至9倍左右，難怪有人已預先炒定中期業績。兩隻股票比較，海通派送往績相對慷慨，維持有四至五成，不妨留意。