蒙牛近期積極向外併購，顯示經中糧入主並進行內部重組後，業務已重上增長軌道。(資料圖片)

雖然「五窮六絕」已經應驗，但阿莊對於「七翻身」係咪真係會出現，其實無乜信心，故已做好七月份大市再試低位嘅心理準備。尋日趁市況反彈，以均價4.78元沽出30,000股威勝（03393），又以均價7.93元減持20,000股中燃（00384），若然短線中燃未能重上50日線7.66元樓上嘅話，會沽埋尚餘嘅20,000股。沽貨主要出於擬增持現金，備留銀彈等下個月再執平貨。

蒙牛近期積極向外併購，顯示經中糧入主並進行內部重組後，業務已重上增長軌道。(資料圖片)

阿莊100萬元投資組合

國務院常務會議決定加快改造棚戶區，但尋日水泥股只係個別發展，海螺（00914）及西泥（02233）僅升0.2至0.8%、中建材（03323）及亞泥（00743）均低收，最叻係隻山水水泥（00691），升5%。老實講，若然消息真係有利水泥業，板塊表現唔會係咁！此外，尋日鋼鐵股同煤炭股繼續被拋售，鞍鋼（00347）、馬鋼（00323）分別跌5%及4%；兗煤（01171）、神華（01088）及中煤（01898）跌幅介乎3至5%，前者有指與錢荒有關，後者則受累煤價下跌，總之利淡因素揮之不去，惟有繼續尋底之旅。

事實上，如果近日市況反彈只係純粹由半年結因素使然，呢個時候入市風險甚高，加埋香港長假期將至，無謂放假都放得唔安落。呢期冇咩好做，多咗時間同四方股友打牙骹，聽表叔口淡淡，其中做房地產嘅話樓盤賣唔出，頭寸緊張；做廠嘅就話人仔係咁升值加埋勞工成本上升，即使原材料價格下跌亦補唔番，睇吓吊鹽水可以吊到幾時！做對沖基金經理嘅就話，今鋪上大人自己引爆炸彈，後果可大可小，未來一季經濟數據難以樂觀，中國市場估值仍有下調空間，故近日不斷沽貨增持現金以規避風險。聽聽埋埋咁多悲觀言論，加埋本周內銀同中央拗手瓜，勢必對實體經濟構成負面影響，所以阿莊呢鋪堅持忍手，睇定啲再算！

內部整頓告一段落

暫時唔做嘢，都可以睇番啲實力股，做定功課等Big Sale再Shopping。蒙牛（02319）繼增持原奶供應商現代牧業（01117）股權至單一最大股東後，最近又向奶粉商雅士利（01230）提全購，可以話係自中糧入股後嘅大動作，呢個現象告訴投資者，中糧入主後圍繞內部生產及銷售嘅整頓工作經已告一段落，嚟緊要着手加快向外併購，以完善產業鏈同構建多元化產品組合。

雖然呢啲大動作效益展現需時，但以目前公司嘅發展狀況，基本上可以肯定已走出毒奶陰影，重拾長期增長軌道，係一隻可逢低作中長線收集的中資食品股。尋日該股收報26.65元，且留意來季有冇機會落番24至25元水平上車。