黎永滔（左）指，外國政府對海外投資者沒太多限制及額外稅收，是吸引外資的最佳誘因。右為湯文亮。

政府辣招打殘工商舖樓市，個別投資者已無耐性等措施出現奇迹性修改，轉而積極將錢轉投海外物業。繼舖壇老手黎永滔（滔哥）早前第三度入市英倫商用物業後，依家揸住物業市值達300億元嘅紀惠集團，其行政總裁湯文亮博士（Jacinto）同劉Sir講，公司早排已睇緊馬來西亞、台灣同澳洲嘅住宅物業，同埋英倫一項商用物業，四項物業加埋總值約4億元。

黎永滔（左）指，外國政府對海外投資者沒太多限制及額外稅收，是吸引外資的最佳誘因。右為湯文亮。

投資者越洋置業最新情況

加辣招推出已經四個月，工商舖市況一個月差過一個月，唔少投資者都趁暑假抖吓。不過，部分就主動出擊，衝出香港另覓新機遇。

湯文亮籲勿再出招

Jacinto同劉Sir講，紀惠早年都有喺加拿大同美國紐約買物業投資，佔公司比例極小，得嗰幾個百分點左右。佢都覺得今次雙倍印花稅措施唔合理，旨在要樓價大瀉為目標，期望政府唔好再出招之際，由於公司每月收租都有約4,000萬元，放喺銀行收息又無肉食，所以早排就睇緊上述四個城市啲物業，下個月會親自到當地視察。

近期唔少投資者都劈價出貨，Jacinto話，早排同銀行啲老友食飯都傾過呢個問題，佢笑笑口話，若該公司睇中有平價筍貨，都會「低撈」入市，不過，就唔急，寧願買唔到，都唔好買錯。

工商舖市料縮7成

不過，滔哥就認為，自己睇中嗰啲貨，業主都無乜點減價，相信喺依家低息環境下，佢哋無出貨壓力，估計當息口開始明顯回升時，至係趁低吸納嘅時機。滔哥仲話，短期會再去英倫探吓仔女，唔排除到時睇啱筍貨再入市。

要知香港個工商舖樓市最近有幾慘，問中原（工商舖）營運總監潘志明就最清楚，佢話出招後已經四個月，睇怕下半年成個工商舖物業買賣有機會跌到只得3,000宗，同舊年同期比將大減逾七成，宗數同○八年金融海嘯嗰陣差唔多，最壞得嗰3,000宗都唔夠，將同○三年上半年沙士期間差唔多。

潘總話，依家業界工商舖從業員3,000幾人，佢哋公司就叫啲前線同事多落區主動做租售，出招後約有5%同事自然流失。