魚缸Blogger：石藥有力再試高位

石藥集團（01093）呢期都算硬淨，股價跌到100日線3.58元附近反彈，尋日因收購消息升多半成，收報3.8元，20日及50日線匯集在3.96元，今轉如果成功升穿，應該有力再試今年高位。

石藥為咗減少對原料藥業務的依賴，繼去年收購恩必普、歐意及新諾威三大資產，同埋月初賣咗蝕錢嘅內蒙古青霉素中間體及原料藥業務後，啱啱再以1.06億元人仔收購從事製造及銷售兩種腫瘤藥物的百克，增強創新藥業務嘅產品組合同競爭力。另公司亦以1,300萬元收購從事製造及銷售原料藥的華盛45%股權，而華盛係佢若干成藥的原料單一供應商，完成後持股量增至100%。

睇番成績表，石藥首季營業額激增2.8倍至25.49億元，純利增長74%至2.19億元，其中「恩必普」、「歐來寧」同「玄寧」系列的創新藥表現標青，今年業績值得憧憬。