太陽日誌2013/6/27

見連續兩日A股即市可以隊低半成，前晚人行終於急急承認，已向銀行提供流動性，終於令持續沉淪的內銀股及恒生指數，出現報復式反彈，大市勁升482點，收報20,338點。然而，升市成交得788億，加埋沽空佔大市成交比例高企13.1%，淡友似乎仲係咬住唔放。六月期指今日結算，後日輪到基金半年結，六月份由頭隊到尾，基金經理粉飾窗櫥的誘因唔細，估計短期大市仲係較大機會彈番上20,700至20,950點之間。

太陽日誌2013/6/27

綜合大行預測中遠業績（人民幣）

尋日個市勁升482點，三大藍籌內銀包括工行（01398）、建行（00939）及中行（03988）分別升6.8%、6.5%及3.3%，合共貢獻182點，佔大市升幅三成八。以前日收市價計，三隻內銀股平均跌到撥備前收入3倍及0.8倍市帳率，稍稍低過一二年九月及一一年十月，市場憂慮中國經濟將出現硬着陸的兩次低位，而尋日的反彈，進一步確認筆者認為短期內銀股股價已於上周至本周初之間見底的可能性。

翠華控股（01314）全年純利1.3億元，增長24.7%，但純利率就上一年的14.5定降至12.1%。對一隻市盈率近40倍的餐飲股來說，業績有些少差池都唔掂！德銀即時出報告叫客戶沽售，同時降低今、明兩財年的盈利預測12.7%至13.2%，目標價睇3.3元。翠華股價尋日逆市隊低6%，見4.5元，嚇親捧場客，不過，份業績仲係令經常幫襯的筆者有多少擔心，到底掌舵人將來想討好班中環賓架？抑或一班食客？個人感受，佢上市之後嘅食物質素真係比唔上之前。

從內銀股反彈，可見整個中資板塊根本就係睇住中央政策搵食，尋日內地傳媒報道，考慮到航運業持續低迷，中央研究支持航運業發展相關措施，由發改委及交通部牽頭，計劃下半年正式上報國務院。消息指，計劃包括調整運力結構、加大資金力度、協助淘汰舊船、以及減免船公司及海員的稅項等等。

航運股盼政策打救

或者市面上太多落後股關係，尋日航運股反彈力度唔算特別勁，中遠（01919）升1.9%，中海集運（02866）升2.6%，中遠太平洋（01199）及招商局國際（00144）都有4.8%及5.8%進帳。當中，中遠今年積極出售資產套現，試圖抵銷主營航運業務的虧蝕，大摩因此預測其今年業績好有機會虧轉盈。

睇番整個六月份，中資股跌到一仆一碌，而老早跌定的中遠，由月初3.34元到尋日收市價3.22元，反算跌得少，雖然靠變賣家當唔係長遠辦法，但如果有扶持政策出台，先止住咳，留住班小股東未嘗不可，睇嚟3元左右經已見底，細細注可以諗吓佢。