股海實戰：電力股 穩陣可靠

中央政治局會議召開專門會議長達五日，官媒高調報道會議強調要由上而下雷厲整肅作風。美銀美林報告話，經歷今次震盪之後，影子銀行產品買家將對潛在風險更加審慎，信貸縮量及融資成本上升，將使得部分項目可能難以取得融資，壞帳可能上升，當投資者將焦點放在債務償付風險，屆時市場才會見到真正底部，估計呢個場面將於明年上半年出現。

博反彈宜認清風險

阿莊勸告各位，中國經濟正在撥亂反正，金融市場要進行結構調整，長遠係好事，但短期痛苦難免，入市博中資股反彈嘅同時，宜認清形勢，提高風險意識。

回說尋日市況，港股反彈勢頭頗為全面。堅持暫不沾手內房同內銀股，可轉睇較穩陣嘅電力股，一來股價已作出大幅調整，二來喺內地經濟總體持續平穩發展以及煤價低企下，電力需求放緩及成本情況均可控，基本面相對穩定。

受累跌市，加上早前傳出部分煤炭設入口限制以及擬減電費嘅消息拖累，近月電力股顯著受壓，華能（00902）、大唐（00991）、華電（01071）、中國電力（02380）及潤電（00836）五大電力股股價由上月高位回落至近日低位，累跌幅度最多達三至四成。不過，由於電企普遍才止損不久，去年底至今渤海煤價跌幅不到4%，且不排除喺夏季用電高峰期煤價會否出現季節性反彈，而減電費有可能會刺激高排放嘅耗電行業，不利節能環保，減電費嘅可能性似乎並不大。

撇除擬與系內公司進行重組嘅潤電，其餘四家電力股一三年預測市盈率已回落至7倍水平，而市帳率則以大唐最低，僅0.7倍，其次係中國電力嘅0.8倍。大唐估值一直較華能存較大折讓，主要反映旗下煤化工業務嘅不明朗因素。惟近日大行瑞銀引述大唐管理層指，旗下煤化工項目運作良好，相信有助股價回穩。尋日大唐收報2.94元，升3.8%，走勢上，2.5至2.6元乃重要支持區，向上主要阻力喺50日線3.3元水平。