上環信德中心西翼有單位近期獲商廈投資者低市價兩成半入貨。（資料圖片）

雙重印花稅令整體商廈樓市死寂，市場肯入貨嘅買家無幾多個，個別業主惟有劈價引客。紀惠集團廖偉麟（Jeffery）就啱啱用1億多元「低撈」上環信德中心西翼一個中層側海景單位，呎價僅1.57萬元，業主劈咗近550萬元，Jeffery話個單位低市價兩成半，劉Sir相信兩年幾以來都未見過該廈呎價去到咁低。

上環信德中心西翼有單位近期獲商廈投資者低市價兩成半入貨。（資料圖片）

紀惠廖偉麟近期購兩商廈單位資料

紀惠Jeffery對劉Sir講，啱啱買咗信德中心西翼17樓02至05室，面積約6,830方呎，擁側海景同山景，原業主本來叫價每方呎1.65萬元，大家傾咗三個星期，最終肯割愛賣，呎價只係1.57萬元，成交金額1.07億元。佢話原業主早在八六年期間以呎價約888元一手購入，涉額都係600餘萬元，依家帳面升咗1億多元，升幅近17倍，套現後可以再作打算。

中保大廈成交涉億六

近排好多投資者都選擇唔入市，好難得中區有過億元寫字樓成交。Jeffery話，有危就有機，今次無透過公司轉讓形式購入，所以印花稅費要800萬多元。不過，佢認為物有所值，樓價平了25%，額外多付幾個巴仙稅費，絕對抵買。

其實，Jeffery喺新辣招後已經撈過平貨，今年四月中看準金鐘力寶中心2座高層單位，業主劈價近兩成放盤，隨即用約2,280萬元購入，呎價只係1.7萬元，重返前年底該廈呎價低位。另外，劉Sir見土地註冊處有份資料，上環中保集團大廈14及15樓有個臨時買賣登記，金額共1.63億多元。

荃灣工廈樓花今派貨

發展商旗下非住宅物業有價有市，近排都趁機出貨。有消息稱，香港興業（00480）的荃灣灰窰角街6號DAN6工廈重建樓花盤，今日會喺該集團總部向地產代理「派貨」銷售，由於單位入場費料約200多萬元，估計有機會單日售罄。上址5至21樓每層分間約11個單位，而22樓為頂層樓層。

另土地註冊處資料，西環卑路乍街38號天星工業大廈，今年最少有8層全層工廈賣咗，最新成交嘅12樓頂層以約4,800萬元售。