太陽日誌

人行擺姿態拒絕放水，一度拖累尋日A股急跌5.7%，但午後賓架界流傳，人行可能在上海陸家嘴論壇上，發布紓緩錢荒的政策，滬綜指由低位挾返110點，收1,959點，微跌0.2%，全日波幅嚇死人。港股尋日一樣上演先殺好友、再誅淡友的劇本，恒指最低見過19,426點，收市前跟A股反彈，全日升41點，報19,855點，總成交增至931億，恒指波幅指數（VHSI）曾升上去30.18一年高位。

太陽日誌

綜合大行預測好孩子業績（港元）

去年六月港股在歐債危機下，隊到落萬八點附近，當時恐慌指數在58.6點見頂！尋日上升及下跌股份比例28對72，比前日的10對90稍有改善，創新高股份10隻，創新低達181隻。港匯有緩步轉強趨勢，執筆時報7.7559，比月中低位回升過百點子，種種迹象顯示，就算恐慌拋售造出的浪底，並非中期低位所在，但相信也相當接近。有外資行老友提醒在下，話近期唔少中資對沖基金要錢唔要貨，狂掟中型市值股份，尋日沽得八八九九，幾乎連櫳底都見埋，看官們如果有心水，可以諗吓開始分批撈底。

賭仔最鍾意跟紅頂白，股市裏面跟住大股東搵食，通常都無衰，近排見新地（00016）郭老太頻頻出手，尋日申報於六月十九日同二十日，連續兩日增持新地合共52萬股，均價分別係99.618元及96.953元，涉資約5,100萬元，持股量升至43.26%。睇番單係六月份，郭老太已經九次入市，合計掃咗255萬股。記得郭老太○八年第四季都試過高頻入市增持，最後仲摸埋個底，都咪話無參考價值。

尋日美林份報告話，剛剛同新地去北美路演，在退市陰霾及新盤銷售條例所限下，新盤滯後推出，拖累近日股價回落，令唔少機構投資者都對新地重拾興趣，認為就算香港樓價真係要由高位大跌五成，新地股價仲比資產淨值折讓16%（目前折讓達51%），同歷史平均折讓相若，加埋近日郭老太在100元樓下密吸，該行繼續畀買入評級，睇135元，相當於30%資產淨值折讓。

好孩子生意唔憂做

今次小股災，一堆二三線outperformer都真係幾傷。專做嬰兒手推車的好孩子（01086），由月初高位4.3元撻落尋日最低2.61元，跌幅近四成，期間除兩個基金股東新加坡主權基金及富達沽過些少之外，仲要無乜壞消息出過，尋日反彈9%，收報2.84元。

好孩子主要以「好孩子」及「小龍哈彼」兩個品牌推出嬰兒推車，基本上往績極穩定，過去六年業績賺介乎1.6億至2億元之間，衰啲講直頭係悶，不過做小朋友生意，勝在長做長有，內地父母連兩罐奶粉都南下嚟香港買，可見使錢落金叵籮身上真係在所不計，最近有分析員估計集團內地銷售團隊人事有變，加埋內地零售業表現一般，未必達到市場樂觀的預期，但以今年賺2億計，市盈率14.3倍左右，同樣炒內地一孩政策告一段落，至少佢比奶粉股平一大截。