股海實戰：地產股 估值吸引

本來以為係普普通通嘅一次季節性市場流動性緊張，演變成一場信貸危機，投資者低估咗新一屆政府應對金融風險隱患嘅強硬姿態。阿莊認為，憧憬市場喺今次大幅震盪過後會見底大幅回升，實在有點不太理智，理由係經歷今次信貸異常緊張，勢必令企業融資成本上升，假設人行繼續唔放水，流入股市嘅資金只會減唔會加。

A股後市未樂觀

再者，目前主要A股指數嘅重磅股都係來自傳統產業如內房及內銀股，喺上半年內地經濟持續放緩，以及半年結嘅大幅波動，相信內銀貸款規模縮減，業績勢受影響，而內房股喺調控緊箍咒下，下半年經營情況將遜於上半年。喺咁嘅基本面之下，A股實在難以飛天。

此外，近周內地盛傳，喺中央大力整肅金融系統下，四大行、銀監委及證監委高層大地震，有多名行長及副行長，銀監委、證監委副主任被勒令退休或免職，以待進一步審查。一片腥風血雨，內銀股風光已不再，即使想作長線投資，阿莊維持周初所講嘅睇法，要揀寧選內地券商股。

睇番香港市場，政府採取措施打擊樓市炒風，上半年發展商新盤銷售可以話係「食白果」，展望下半年，聯儲局披露「退市」路線圖，低息環境預期終結，債息回升之下，投資者對物業投資趨於審慎，故發展商嘅銷售前景仍不明朗。

不過，從估值角度睇，目前地產股嘅估值處於五年低位，較一三年NAV折讓逾四成，基本上已一定程度反映了樓價再跌一至兩成，從而拖低地產股NAV嘅影響。政策因素方面，隨着市場對樓價預期有所改變，特區政府已沒有再推新辣招嘅需要。再者，與內房股不同，綜觀本地五大地產股嘅負債水平、融資成本以及土儲情況，實在沒有割價促銷套現嘅必要，喺息口回升有序之下，樓價有望趨於穩定，用家市場將支持本地樓市健康發展，地產股表現有望與大市同步，相對內房及內銀股穩陣。